Rossdschutz fir die Wildledder-Schuh

Die Helga iss mit ihra 48 Johr guud beinanner, bloß ihra Aang sänn inzwischen aweng schwach worrn. Zer Frieh ban Kaffee muss'sa die Zeidung mit ausgschdreggda Arm vor sich holdn, sunsd verschwimma die glann Zaaln vor ihra Aang und sie grichd net mit, woss in der Region olles bassierd iss. "Kaaf dir hold endlich amoll a Lesebrilln", gnäärd ihr Mo, der Armin, scho ewich an ihr rum, obber die Helga hot einfach net auf ihrn Oldn k'heerd - bis letzda Wochn. Do hot'sa ihr Meinung geänderd.

Die Helga und ihr Mo hamm sich amds dahamm aweng flodd gemachd, wall'sa mitnanner aufs Wiesnfessd geh wolldn. Wie obber der Armin zern erschdn Moll seina neia Wildledder-Schuh ausn Schränkla raus hulld, hot'er gedachd, er sichd net richdich: Dess herrlich waacha Ledder woa zerfressn, vuller Lecher, und hot ausgschaud wie aus der Milldonna! Der Armin hot rum gebläägd wie a Verriggder und wäa am libbsdn sofodd ins Schuhgschäfd gewerchd, um na Besitzer zur Sau zer machn, woss'mer ihn do fir an Missd verkaafd hot. "Dabei hob ich fei die Schuh nooch na Kaaf dahamm gleich vorschrifdsmeeßich imprägnierd", hot die Helga gsochd - und do iss na Armin gleich aweng a Verdachd kumma. "Hull amoll dess Imprägnier-Schbree, damit ich lesn ko, woss do draaf schdedd", hot'er sei Olda ogewiesn - und die hot die blecherna Schbree-Dosn aus der Besnkammer gebrachd, wo olla Butzmiddl ineran Karrdong drinna lieng. Der Armin schaud die Dosn o - und do hätt'na fassd der Schlooch gedroffn. "Dess iss doch ka Wildledder-Schbree, sondern dess Rossdschutz-Middl fir unner Audo", hot'er gejammerd, "hossd dä du net gsehng, woss auf derra Dosn draaf schdedd?"

Die Helga hot fassd gegrinna. "Du wassd doch: meina Aang!!", hot'sa schuldbewussd zugeem. Und dann hot sich dess Ungligg raus gschdelld: Die Helga hot die brauna Dosn min Rossdschutz-Middl mit derra brauna Dosn vom Wildledder-Schbree verwechsld.

Aufm Weech zum Wiesnfessd hot der Armin seina nooglneia Wildledder-Schnürer in die schwarza Donna nei gschmissn - und erschd nooch der driddn Mooß im Fessd-Zelld hot'er sich so weid beruichd, dass'na dess Bier und die Brodwärschd langsam widder gschmeggd hamm. Und die Helga hot näggsda Wochn an Dermin ban Aung-Arzd... Gerch