Der Harald aus Neihof iss im Urlaub mit san Wohnmobil nauf an die Ostsee gfohrn, wall do droom immer aweng a frischer Wind wehd.
Am Eingang voneran grußn Cämpingblatz hot’er fir 16 Dooch im Voraus die Schdellgebiehr fir sei "WoMo" bezohld - und dann hot’er an der Kassa gleich aa 16 Duschmarkn firsch "Sanitärgebäude" grichd. "Da drinnen sind zehn moderne Duschkabinen", hot der freindlicha Aufseher gsochd, "wenn Sie eine Marke in den Schlitz gesteckt haben, können Sie in der Dusche den roten Knopf drücken, dann läuft das Wasser."
Nooch derra Underweisung iss der doddal verschwitzda Harald gleich moll in die "Kabine 1" nei, hot sich ausgezoong und wolld sei Duschmarkn in den Schlitz schdeggn, obber Dunnerkaal: Außer den rodn Gnobf woa in derra Kabina nix zern finna! Also hot sich der Harald widder ogezoong, iss naus in den Vorraum ganga und hot nooch längern Rumluurn hindn an der Wänd an Audomaadn endeggd, wo a Hinweisschildla olles ergläärd hot: "Hier die Nummer der Duschkabine wählen, dann die Plastikmarke in den Schlitz einwerfen, anschließend die Kabine aufsuchen und den Duschvorgang durch einen kurzen Druck auf den roten Knopf starten. Durch eine Zeituhr wird das Wasser am Ende automatisch abgeschaltet".
G enauso hot der Harald olles gemachd: Er iss in die Kabina nei ganga, hot sich zern zweidn Moll ausgezoong, dann auf den rodn Gnobf gedriggd - obber ka aanzichs Drebfla iss ausn Duschkobf raus kumma. Und wall aa nooch fimfmoll Driggn nix geloffn iss, hot sich der Harald widder ogezoong und iss ziemlich genervd widder in den Vorraum naus, wo er an annern Urlauber gedroffn hot. "Die Dusche Nummer 1 ist seit ein paar Tagen kaputt", hot der fremma Mo zum Harald gsochd - und der iss verärcherd zer san Wohnmobil gschdabfd und hot a zweida Duschmarkn k’hulld. Am Audomaadn im "Sanitärgebäude" dann a neia Versuch: Dessmoll hot der Harald die "Duschkabine 2" gewähld, hot die Markn in den Schlitz neigschmissn - und heerd im selm Momend, dass in der fimf Schridd endferndn "Kabine 2" aa scho dess Wasser rauschd. Er iss sofodd in die Kabina nei gewerchd, hot sich Husn, Underhusn, Hemm und Soggn rogerissn, damit’er schnell under den Wasserschdrohl kimmd - obber dann hot’er gebläägd wie a Sau, wall dess Wasser siedend haaß woa. A Gligg, dass sich die Dusch nooch drei Sekunden gleich widder audomadisch abgschaldn hot, sinsd hätt sich der Harald wer-wass-woss verbriehd.
Z ornich hot’er sich nooch den Inferno zern driddn Moll ogezoong, iss widder naus in den Vorraum - und do iss der Mo von vorhin grod aus der "Duschkabine 4" raus kumma. "Wenn Sie sich beeilen, können Sie sich in meiner Kabine schnell duschn, da läuft noch das restliche Warmwasser, das ich nicht verbraucht habe", hot’er na Harald ogeboodn. Also iss der Harald sofodd in die freia Kabina nei gerennd, hot sich widder naggerd ausgezoong, mit Duschgel eingsaafd - obber wie’er sich grod under die Dusch schdelln wolld, hot die Zeiduhr dess Wasser abgschalld. Der Harald woa fix und ferrdich. Von Kobf bis Fuß vuller Duschgel iss’er schblidder-fooser-naggerd aus der Kabina in den Vorraum naus und hot sich neber den geheimnisvulln Audomaadn aneran Waschbeggn dess bichicha Zeich min Handduch abgewischd. Der Harald iss a friedlicher Mensch, obber bei derra Reinigungsbrozedur hätt’er fei ums Hoor an fremma Mo a Schelln geemd, der woss neigierich von der Diir reigschaud hot und vorwurfsvull zern naggerdn Harald gsochd hot: "Schämen Sie sich, Sie Entblößer! Hier laufen auch kleine Kinder herum - wir sind doch nicht auf einem FKK-Gelände." Gerch
