Wehe, wenn a Bauchdänzera aufdauchd

Der Willi woa mit seiner Fraa am Rosnmondooch aufm Schitzn-Fasching im Vereinsheim. "Obber heier sauf ich net widder olles durchnanner wie im letzdn Johr", hot’er vorher in diefer Selbsderkenndnis zer seiner Oldn gsochd, "sinsd schau ich am näggsdn Frieh widder aus wie der Dood von Forchheim." Sellmoll hot neemlich der Willi am näggsdn Dooch dauernd dess Gfiehl k’habd, er fährd Achderbohn, und in san Kobf wummerd a Bresslufd-Hammer. Dessweecher hot sich der Willi dessmoll rechdzeidich mit Dableddn eigedeggd und vom Abbodeecher a boa Dibbs k’hulld, wie’mer na Kader am näggsdn Dooch am bessdn iberschdedd. "Sie dürfen nicht zu viel durcheinander trinken", hot der Billndreher embfohln, "ich rate Ihnen: nur Bier oder nur Wein oder nur Sekt - und auf keinen Fall dazwischen Schnaps!" Der Willi konnd a sedda Warnung sofodd beschdädinga: "Schdimmd genau! Schnabbs knibbsd ann fei gleich dess Lichd aus!"

In guder Schdimmung iss also der Willi mit seiner Anna amds aufn Schitzn-Ball ganga: der Willi ols Eelscheich und sei Olda ols Indianera. Bis Middernachd hot sich der Willi eisern an seina Vorsätz k’holdn und hot nix annersch gsuffn wie siem Seidla Bier - ka Gleesla Wein, kan Broseggo, kan Wodka-Feige, kan dobbldn Obsdler. Obber wie na dann a mollicha Bauchdänzera zeran Tango k’hulld und anschließnd in die Bor nei gschlaafd hot, iss na Willi sei Widerschdand zammgebrochn. Er hot erschd a Fläschla Erdbeer-Seggd schbringa lossn, anschließnd hot’er an "Calypso-Drink" miteran Schdrohhalm neigsaugd - und wall die himmlblaua Karibik-Schbeziolideed goa so gud gschmeggd hot, gleich nuch zwa hinderher. Etzerd woa der Willi nimmer zer bremsn. Er hot nuch zwa Gedobbda beschdelld, die wossn die Schitzn gern ols Zielwasser zu sich nehma, damit ban Schießn die Händ net ziddern - und dann wolld’er seiner Bauchdänzera aweng an die Wäsch no geh - do schdedd aferamoll im rodn Schummerlichd sei Olda in der Diir. "Salemaleikum", hot die Indianera ganz barsch zu ihrn Eelscheich gsochd und hot’na von derra Bauchdänzera weg gezerrd, die woss offnboa - so hot jednfolls die Anna na Eindrugg k’habd - ihrn wehrlosn Mo vernaschn wolld.

Der Willi konnd sich am näggsdn Frieh an nix mehr erinnern. Nooch den "Calypso-Drink" hot’er neemlich an Filmriss k’habd - und etzerd woa der arma Eelscheich wie immer nooch na Rosnmondoochs-Ball im Bedd geleeng, wall’er von ana alkoholischn Dambfwalzn iberfohrn worrn iss.

Nooch an Glos Wasser mit zwa Aspirin und drei Brause-Dableddn hot’er hoch und haalich gschworn, dass’er dess näggsda Moll aufm Fasching bloß nuch Schbrazlwasser drinkd - es sei denn, dass widder a Bauchdänzera aufdauchd und mit die Aangdeggl glimberd … Gerch