Der Manfred hot sei Audo auf den glan Barkblatz vor an Hofer Ordobädie-Gschäfd abgschdelld, wall er seina neia Einloong fir die Schuh abhulln wolld – er hot neemlich ziemlicha X-Baa und leffd dauernd aweng schief. Nooch a boor Minuddn iss der Manfred auf seina zwa frischn Einloong mit federnda Schdriddla ausn Gschäfd rauskumma und wolld ins Audo eischdeing – do hot’er gedachd, er sichd net richdich: Hindn am rechdn Kodfliegl woa a Delln drinna, und der schwarza VW-Golf, der woss vorhin gnabb neemdro gschdandn iss, woa weg. Firn Manfred woa olles gloa wie Gleesbrieh: Der unbekannda Blindfuchs vom schwarzn Golf iss riggwärds aus der Barkliggn rausgfohrn, iss bei den Maneever aufn Manfred san Koodfliegl nauf gebrummd – und dann Fohrerfluchd! Vuller Wuud iss der Manfred sofodd widder ins Gschäfd neigewerchd, hot die Sauerei der Verkaifera gemeld – und die hot erschd die Bollizei ogerufn und dann min Händy draußn die Delln am Audo ols Beweis foddografierd. Karz draaf sänn zwa Bollizisdn eigedroffn, hamm aa olles foddografierd und na Manfred sei „Anzeige gegen Unbekannt“ aufgenumma. „Allerdings zeigen die Spuren im Schnee, dass der Vorfall nicht hier passiert ist, sondern schon vorher irgendwo anders geschehen sein muss“, hot der ana Bolli gsochd – und hot na Manfred net vill Hoffnung gemachd, „da ist es schwierig, den Unfallverursacher zu finden“.
