Mit ihra 56 Johr iss die Helga zwoa immer nuch a scheena Fraa, obber in den Alder meldn sich nadirlich scho die erschdn Faldn – vor alln dann, wenn noocheran haaßn Sommer die Haud ziemlich ausgedroggnd iss. Dessweecher leechd die Helga ab Sebdember olla boor Dooch a Gsichdsmaskn auf. Die kaafd’sa ols schdrenger Öko-Fän ollerdings net im Drogeriemarkd, sondern mischd sa dahamm selber zamm – noocheran Rezebd aus ihrn Lieblingsbuch „Mama machd alles selber“: drei Essleffl Moocherquark, a Schuss sießa Sahne, a boa Schbritzerla Mandl-Eel, wall dess die Haud schee beruichd – und ols greenender Abschluss na Dodder voneran Bio-Ei. Dann werrd olles ineran Schisserla zammgeriehrd und iber Nachd im Kiehlschrank kold gschdelld. Am näggsdn Frieh, wenn ihr Mo außer Haus iss, wall’er ärbern muss, leechd die Helga a CD mit leiser Medidazionsmusigg auf und schdreichd sich dann ihrn Zauberbrei miteran Bensl ins Gsichd. „Do schbier ich fei sofodd a wohlicha Endschbannung“, sochd sa immer, „es gibd einfach nix Schenners.“
