Ineran Dorf im Landgreis iss kerzlich a Gebardsdoochs-Feier mit vier Nachbers-Weiwer zwischn 60 und 70 Johr ziemlich ausn Ruder geloffn. Eigndlich wolld die Olga, die woss 65 worrn iss, ihra drei Freindinna amds bloß aferan glan Umdrunk eiloodn, obber olln viera hot der Broseggo und der Olga ihr selbergmachder Eierlikeer dermoßn gud gschmeggd, dass’sa nimmer zern bremsn woan. Sie hamm sich dauernd zugebrossd und iber die oldn Zeidn gwaafd – karz vor Middernachd sänn’sa jednfolls ibereinschdimmend zur Erkenndnis kumma: Die Händys sänn vill zer komblizierd und die ganza digidala Welld soll der Deifl hulln, der Berchermassder hot’s fausddigg hinder die Ohrn, und der Organisd in der schenn Dorfkerng iss aweng a Hallodri, obber dess Leem iss drotzdem schee. Um zwelfa iss dann die Anna aufgschdandn, hot sich mit wagglerda Baa verabschied, iss von der Hausdiir naus gschwankd – und draußn miteran Buscher die drei Schdefferla nundergschderzd. Die Olga hot gleich die Sanni ogrufn – die sänn aa sofodd kumma und hamm die Anna, die woss drotz ihrn Bluuderguss am Hindern und ihra Abschirfunga an die zwa Gnie immer aweng vor sich hie gekicherd hot, nooch der „Erste-Hilfe“-Behandlung hammgfohrn.
