Des wenn der Korl vorher gewussd häd, des mit den komischn Dobf ...
Der Korl woa scho immer aweng a Difdler. Ob Raafn-Wechsl an der Mudder ihrn VW Golf oder wenn im Haus die Zimmerdiir gequiedschd hot, ob a verschdobfda Abfluss in der Bodwanna oder a kabudda Milchschäumer am Kaffee-Audomadn – der Korl hot olles rebarierd und widder gängich gemachd.
In seiner Begeisderung fir dechnischa Kichngeräde und wall’er a older Geizgroong iss, hot’er sich kerzlich im Internet a ginsdichs Schnäbbla aus China beschdelld: an eleggdrischn Mehrzwegg-Dobf firsch Kochn, Dämbfn und Broodn – sogoa seina gelibbdn Bomm Fridds konnd’mer angeblich in derra lukullischn Allzwegg-Waffn her zaubern.
Wie der Multi-Dobf letzda Wochn ineran Kardong dahamm abgelieferd worrn iss, woa nooch na Ausbaggn ban Korl die Enddaischung fei gruß: Der Dobf mussd aus achd aanzlna Drimmer zamm gebaud werrn – hold wie die Meebl von der IKEA. Leider woa obber ka Zeichnung und a ka schrifdlicha Gebrauchsanweisung dabei, sondern bloß a Zeddl mit a boor wichdinga Informaziona, damit sich aa der gressda Bleedl auskennd – do hot neemlich der chinesische Dobf-Lieferand gschriem:
„Glas, das an der Hitze ist widderstandsfähig ist. Griff kochen- Dampf/Korb für Friture. Kapazität =1,5 Liter. Nicht einfach befleckt sich eine Wartung. Nützlich, um jede Lebensmittelart brat. Köstlich um am Wasser zu kochen. Benutzt sich als Stieltopf, nachdem den Korb weggenommen u haben. Sie können benutzen, um am Dampf jede Nahrungsmittelart kochen, nachdem Korb weggenommen.“
Na Korl hot’s nooch derra umfassndn Aufglärung an seiner Schläfn die Adern rausgedriggd wie die C-Schlaich von der Leimitzer Feierwehr. Er hot erschd an dobbldn Obsdler neigsuffn, und dann hot’er den eleggdrischn Dobf ganz vorsichdich aneran schwarzn Gnebfla ei-gschaldn. Am Dobf hot a Blitz gezuggd, und dann woa im ganzn Haus der Schdrom weg – so sänn’sa hold, die Schnäbbla aus China … Gerch
