Ineran grußn Hirschgehege in der Neh von Hof hot’s Nachwuchs geem – und wie’s hold bei die Viecher manchsmoll bassierd: Die Mudder hot sich um ihr frisch geboorns Hirsch-Kälbla net gekimmerd. „Fraa“, hot dessweecher der Besitzer vom Wildbark zer seiner Anna gsochd, „ich nimm morng dess arma Kälbla ausn Gehege raus und bräng’s zer uns mit hamm in unnern grußn Gaddn – du mussd dich hold um dess arma Viechla aweng kimmern“. Und werglich: Die Anna mit ihrn Mudder-Gfiehl hot dess Hersch-Beeby Dooch und Nachd mit der Flaschn aufgezoong – genauso wie frieher ihra einga Kinner. Sogor nuch ausn selm Fläschla wie sellmoll ihra Gunger hot etzerd dess glana Herschla von der Anna die ogewärmda Milch grichd - und immer sofodd am Schnuller genuggld und mit laudn Gschmatz olles in sich nei gschlabberd. Draußn im Gaddn iss dess Kälbla auf Schridd und Dridd genauso hinder seiner Ersatz-Mudder her gerennd wie vor 20 Johr der Anna ihra Kinner.
