Seid a boor Wochn kämbfd der Rendner Lorenz mit Nordic Walking geecher sei Bier-wambn. Er walkd zwoa immer nuch am libbsdn ohne Schdeggn zer seina Schdammdischbriider ins Werrdshaus nei, obber er freid sich aa wie a Schneekeenich, wenn’er noch ana schwitzichn Rundn mit die Schdeggn um na Untreusee widder dahamm iss – under der warma Dusch singd’er dann sogor aweng vor sich hie. Obber letzdn Mondooch iss na dess Singa verganga, wall in oller Herrgoddsfrieh nooch seiner Nordic-Walking-Rundn ban Duschn dess wohlich warma Wasser aferan Schlooch eiskold worrn iss. Der Lorenz iss gleich wie a naggerds Rumblschdilzla in der Duschkabina rumk’hubfd, obber do woa nix zer machn – die Dusch wo kabudd! Naggerd und mit aufgschdellda Gänshaud hot der Lorenz sofodd a Sanidärfirma ogerufn, obber es hot sich schdadds an Fachmo bloß der „Anrufbeantworter“ gemeld. „Ihr missd sofodd zer mir kumma und mei Dusch rebbariern“, hot’er zer derra Audomadnschdimm gebläägd, „obber aweng dalli-dalli!“