In der Abodeegn hot’s scho immer olles geem, woss a Mensch fir sei Gsundheid brauchd – von Herzdableddn bis zer Eikalybdus-Bombom geecher Halsweh, voneran dringend noodwendichn Schmerzmiddl, wenn ban Mo noocheran Schweinshäxla samsd drei Seidla Bier und an dobbldn Obsdler in der grußn Zeha die Gichd rebellierd, von der Korona-Imbfung bis zur „Sonnencreme mit Lichtschutzfaktor 50“, woosd nooch siem Schdundn bei 35 Grad in der bralln Sonna immer nuch a hella Haud hossd, wie wenn dich grod a Maler frisch rogeweißld hodd. Dass ollerdings die Abodeegn ihr Heilmiddl-Sorrdimend etzerd aa um Garkn und Eier erweidern, hoddmer zwoa nuch nie k’heerd – obber in unnera moderna Welld iss ja olles meeglich.