Der Manfred und sei Fraa hamm kerzlich aneran Wochnend widder moll ihrn Sohn bsuchd, der woss in Minchn ärberd und in Schwabing a scheena, obber saudeira Wohnung hot. Aneran Samsdooch sänn die zwa Hofer min Audo in Minchn eigedroffn – grod richdich zern Kaffeedrinkn. „Hoffndlich finna mer in derra belebbdn Schdraßn, wo unner Buu wohnd, an Barkblatz“, hot der Manfred zer seina Oldn gsochd – und werglich, wie wennersch geahnd hädd: Er hot nerchetzwo a freis Blätzla fir san VW Golf endeggd. „Ich fohr amoll um na ganzn Blogg rum“, hot’er vor sich hie gebrammld, „do werrmer scho a Luggn finna“ – und iss auf der Such noocheran Barkblatz um den Haiserblogg rum gfohrn, obber ohne Erfolch. „Ich dreh hold nuch amoll a Rundn“, hot’er dann sei Olda informierd und iss zern zweidn moll im Viereck um na Blogg rum gfohrn – obber er hot widder ka Gligg k’habd. „Dess gibd’s doch net“, hot‘er scho aweng unleidich gebrummd, „do muss doch am hellichdn Dooch amoll aner aus seiner Luggn raus fohrn.“ Also iss na Manfred nix weider ibrich gebliem, wie a dridda Versuch rund um na Blogg – und widder hot sich nix nix ergeem. „Etzerd browier ich’s nuch a verrds Moll“, hot’ziemlich zornich gebleffd, „obber dann iss Schluss.“ Leider hot dann aa die verrda Suchaggzion nix gebrachd – und der Manfred hot die Faxn digg k’habd. Er hot Gas geem und iss in a ziemlich weid endfernds Barkhaus gfohrn.