A Klistier im Elsaß

Der Schorsch und der Heinz sänn digga Freind - obber fei net bloß, wall jeder von denner zwa Mannsbilder weid iber zwa Zenndner auf die Wooch brängd. "Ihr zwa Schbegger missd endlich amoll a boa Kilo abnehma", hamm kerzlich ihra Weiwer gsochd, "sinsd blatzn eich ban Rasiern demnäggsd die Baggn auf, wennder eich mit der scharfn Glinga aweng schnadd !" Mit zammgebissna Zeh hamm sich dann die zwa Männer endschlossn, dass’sa sich a Wochn lang ineran glan Hodell im Elsaß eiquaddiern - und a schdrenga Fassdn-Kur machn.

Am erschdn Fassdn-Dooch wolldn’sa, um na Darm kombledd zer endleern, gleich in der Frieh an Lidder Wasser mit Glaubersalz drinkn - schdadds an schenn Friehschdigg mit Eier und Schbegg, mit Leberwarschd und Elsässer Winzerkees. Obber gleich ban erschdn Schlugg hot’s die zwa Hofer bei derra Glaubersalz-Brieh dermoßn k’hoom, dass’sa ums Hoor gschbeid häddn. "Mir machn fir unner Darm-Endleerung lieber an Einlauf", hot der Schorsch ols ehemolicher Bundeswehr-Sani gsochd, "dessweecher gänga’mer sofodd in a Abbodeegn und kaafn a Klistier!"

Also sänn’sa olla zwa in die Schdadt Colmar gfohrn. "Ke-vulee-vu?", hot der Abodeecher auf Franzeesisch gfrochd - und dodermit hot dess Ungligg ogfangd, wall doch die zwa Hofer außer Frängisch ka weidera Fremdschbrooch beherrschn. "Wir zwei nix essen", hot der Schorsch san Wunsch noocheran Klistier aweng genauer beschriem - und hot auf san Hindern gezeichd. "Brauchen ein Klistier! Da Wasser hinein, Aqua - cabiddo?!?"

Der Abodeecher hot bloß Bohnhof verschdandn. Na Schorsch hot‘s scho aweng na Schwaaß auf der Schdern rausgedriggd. "Hier", hot’er dann san Kaufwunsch nuch aweng bräziser beschriem, indem dass’er immer widder min Zeichefinger auf san Allerweerdesdn gedadd hot, "hier Gummischbritze mit Wasser…und dann bffd!!" Der Abodeecher und drei weidera Kundn, die wossn inzwischn aa reikumma sänn, hamm ban Schorsch seina Vorfiehrung ziemlich bleed gschaud, obber nix verschdandn. "Aqua", hot der Schorsch zern ixdn Moll erglärd und widder mit die Händ gesdikulierd - und schließlich hot’er zum Atomschlooch ausk‘hulld. "Hobb", hot’der friehera Sani san Kumbl Heinz aufgforderd, "knie dich etzerd amoll vor mich hie, dann fiehr ich in der Zeichn-Schbrooch vor, wie’mer a Klistier verabreichd" - und dann hamm die zwa Hofer Schbegger, die wossn ausgschaud hamm wie jabbanischa Sumo-Ringer, middn in derra Abodeegn a zirkusreifa Pantomimen-Nummer abgelieferd. Am End hamm der Abodeecher und die Kundn begeisderd Beifoll gegladdschd - und der Elsässer Weißkiddl hot in fließendn Deitsch gsochd: "Natürlich haben wir ein Klistier für Sie, aber es war einfach zu schön, wie Sie das erklärt haben …" Gerch