Der Gunger hot sofodd die Gfohr erkannd. "Ich glaab, dess iss ka guda Idee", hot’er na Vadder gewarnd, "mir zwa kenna doch außer Schbiegl-Eier nix." Na Babba, der woss ka Freind vonera zu waachn Kinner-Erziehung iss, sänn bei derra unverscheemdn Bemerkung gleich links und rechds an die Schleefn die Adern gschwolln. "Hold die Glabbn", hot’er na Gunger ogebleffd, "sinsd griggsd a boor hinder die Leffl!" Und dann hot’er sei subber Idee aweng genauer erglärd: "Die Mudder schaud doch im Fernsehng immer so gern na Schubeck zu. Dessweecher schenk’mer ihr a Kochbuch vom Schuhbeck - und am Mudderdooch koch’mer ihr dahamm aus den neia Biichla gleich woss Guds."