Gleich zwamoll vom Blitz gedroffn

Droom am kullschwarzn Himml hamm die Blitz gezuggd, und hundn hamm die Leit im Schloofzimmer gezuggd, wall’sa gedachd hamm, dess wilda Gwidder kindichd na Welld-Undergang o, den woss der Nostradamus vor 500 Johr brofezeid hot. Im Fernsehng hamm’sa jedn Dooch genau beschriem, wie’mer sich vor die leemsgfährlichn Blitz schitzn ko: net dellefoniern, wenn ringsrum die Welld in Hagl und Blitz versinkd, net im Deich rum schwimma, net aneran Eichnbaam no lahna, net aufrechd in der Wiesn schdeh bleim - do frochd’mer sich nadirlich, wellera Debb machd dä so an Bleedsinn?!

Obber wo die Gfohr werglich lauerd, sochd ann kaner! Dass’mer zern Beischbill beieran schwern Gwidder net min aufgschbanndn Rengscherm draußn im Gaddn rum schbaziern derf, wall die eiserna Schermschbitzn wie a Blitzableiter wirkd - dann schleechds neemlich in dan Rengscherm ei, und bei dir selber iss Maddäus am Letzdn! Männer solln bei Gwidder auf goa kan Foll an Huud miteran Gamsboord aufsetzn - weecher derra glan Medall-Hilsn, wo die Gamshoor drinna schdeggn, do schloong neemlich die Blitz gern ei. Genauso gfährlich iss, wemmer min Gehschdeggn in der Lufd rum fuchdld. Und folls ann des Gwidder im Gaddn middn ban Grilln derwischd, gibd’s bloß aans: sofodd abhaua, sinsd hossd die eiserna Fleischgoobl zern ollerletzdn Moll in der Händ k’habd.

Die massda Angsd hot mei Nachber Hans. Der iss vorigs Johr in san Suff karz vor Middernachd die Kellerdrebbn nunder gfloong, wall’er sich schnell nuch a letzds Fläschla Bier hulln wolld. Bei san Schdurz hot’er sich sellmoll dess rechda Baa und na Gnechl gebrochn. Seitdem hot’er im Fuß und im Gnie a haufm Neegl drinna - ka Wunner, dass‘er beieran schwern Gwidder weecher denner innerlichn Blitzableiter vor Angsd am ganzn Kerrber schlodderd.

Dess gressda Gligg hot ja vor villn Johr amoll a Sachs ausn Vogdland k’habd - den hot damols beieran Gaddn-Fessdla a Blitz.gedroffn, dass’er mit die Brodwärschd in der Händ dood umgfalln iss. Sei Sohn und a zufällich anwesnder Doggder hamm zwoa sofodd Wiederbelebungs-Versuche gemachd, obber do woa nix mehr zer reddn. Obber während ringsrum die annern Leit fassungslos auf ihrn doodn Freind gschaud hamm, hot bletzlich miteran Gracher a zweider Blitz in den arma Mo aufm Bodn eigschloong - und der zacha Vogdländer hot wie noocheran Eleggdro-Schodd widder zern schnaufn ogfangd und werglich die zwa Blitz iberlebbd. Die Sachsn sänn fei elenda Gribberla…

Gerch