Subber Dechnigg mit Muggn

Der Korl hat sich a neis Audo kaafd - do iss olles drinna, woss die moderna Dechnigg zer biedn hot. Im Werbe-Broschbeggd woa genau beschriem, woss der Korl etzerd fir a subber Audo hot: "Selbstständiges Einparken, Spurwechselassistent, automatisches Notrufsystem, Temporegulierung - und alle Einstellungen können wie bei einem Smartphone an einem Touchscreen-Display durch Antippen, Ziehen und Wischen eingegeben bzw. bearbeitet werden. Beim Navi kann das gewünschte Ziel auch durch Sprache eingegeben werden".

Der Korl woa begeisderd, woss dess Audo olles ko - und hot dess ganza Zauberwerk am Wochnend gleich moll ausbrowierd. Er iss mit seiner Oldn ins neia Audo eigschdieng und hot drinna laud und deidlich na Befehl geem; "Wir wollen nach München ins Zentrum zum Stadtbummel." Dann hot’er auf die Dassdn "Start" gedriggd - und los ging die Fohrd. Auf der A 9 hädd sich die Fraa vom Navi ihra Hinweis zwoa schboan kenna, obber dann in Minchn hamm die Anweisunga ausn Navi brima k‘holfn.

Nooch na Schdadtbumml wolldn der Korl und sei Fraa schnell nuch zeran karzn Verwandtn-Bsuch nooch Rosnheim fohrn. Also hot der Korl ins Navi eigeem: "Bitte fahre uns nach Rosenheim" - na genaua Weech in Rosnheim zum Ongl Heiner san Haus hot der Korl von frieher her nuch gud gekennd. Also hot’er dann min Zeichefinger widder auf "Start" gedibbd - und ab ging’s. Die zwa Hofer woan faszinierd, wie subber dass‘sa von derra unbekanndn Fraa ausn Navi darch die Millionaschdadt Minchn naus geloodsd worrn sänn: jeda Greizung, jeder Dunnl, jeda Abbiechung - olles hot gebassd. Obber auf der B 15 karz vor Rosnheim iss der Korl am Schdeier zamm gezuggd, wall dess Navi aferamoll gemeld hot: "In 300 Meter bitte rechts abbiegen". Der Korl woa vellich iberraschd, wall’er doch frieher zer san Ongl Heiner auf der B 15 immer direggd bis ins Rosnheimer Zendrum nei gfohrn iss. "Vielleichd kennd dess Navi a Abkerzung", hot der Korl gebrammld, "also fohr ich hold rechds ab!"

Dann sänn obber die Anweisunga ausn Navi immer rädslhafder worrn; "rechts ab", "geradeaus", "nach links" - dauernd ging’s darch unbekannda Derfer. Schließlich sänn der Korl und sei Olda auf an schmoln "Landwirtschaftsweg" aneran Bauernhof okumma - direggd davor schdand a griins Schild mit der Aufschrifd "Au" - ols Hinweis aferan Weiler. Der Korl iss min Audo schdeh geblöiem - und genau in den Momend hot die freindlicha Fraa ausn Navi gemeld: "Sie haben ihr Ziel erreicht". Der Korl hot gschaud wie a Achhernla, wenn’s blitzt. "Die neimodischa Dechnigg hot hold ihra Muggn", hot’er zer seiner Fraan gsochd - und der iss im selm Aangbligg dess Groschnlichd aufganga. "Wie’sd du vorhin zum Navi ols Befehl ‚neues Ziel ist Rosenheim‘ gsochd hossd, hot mich doch genau in derra Sekundn a Muggn gschdochn und ich hob ‚Au‘ gebläägd", hot na Korl sei Olda dess Rädsl geleesd, "und etzerd sämmer in Au bei Rosenheim!!!". Die moderna Dechnigg hot werglich ihra Muggn… Gerch