Woss die Hofer Schtadtkassa dringend braichert, hot die Fraa Friedrich gschafft: sie hot ganz unverhofft 64000 Euro gricht - und zwor bei derra Quiz-Scho ,,Wer wird Millionär?''. Zwor iss die guuda Fraa net ganz Millionära worrn, obber mit ihrn Gewinn konn'sa sich daweeng fei aa scha a boor Pfund Erpfl leistn. Ums Hoor hätt'sa ja 125000 Euro oder nuch merra gewunna, obber leider wor ihr Dellefon- Tschoker net in Form.
Dess wor der ehemolicha Direkter vom Jean-Paul-Gymnasium - und wer den kennt, der wass: woss der Mo im Kopf drinna hot, do ko'mer ols normola Bierdrinker bloß neidisch saa. Der olt Dr. Schmiedel wass einfach olles! Ob's um die keltischa Besiedlung gett oder umeran Schpruch vom Kaiser Cäsar seelich, ob's die Ohrknecherla vom australischn Nosnaffn bedrifft oder die Frooch, warum der Drombeeder ban Blosn seina Baggn zamm'bresst und der an der Tuba bleest'sa auf - do brauchst bloß na Schmiedel froong, dann griggst die richticha Antwort.