Wennsd dahamm kana goldna Uhrn und kana Brillis rumlieng hossd oder falls im Schloofzimmer undern Kobfkissn net a boa Dausnd Euro verschdeggd sänn, nocherd brauchsd vor Einbrechern ka Angsd hamm.
Wennsd dahamm kana goldna Uhrn und kana Brillis rumlieng hossd oder falls im Schloofzimmer undern Kobfkissn net a boa Dausnd Euro verschdeggd sänn, nocherd brauchsd vor Einbrechern ka Angsd hamm. Obber seitdem dass etzerd in Hof sogoa am hellichdn Dooch Einbrecher die Haiser ausraabern und Geld und Schmugg und Fohrreedla glaua, leffd manchn Hausbesitzer vor Angsd die Gänshaud na Buggl nauf und nunder.
Am Schdadtrand iss kerzlich a Mo mit seiner Oldn von ana schenn Wanderung am Ochskobf hammkumma - und wie’sa die Hausdiir aufgschberrd hamm, hot’sa fassd der Schlooch gedroffn: Im Wohnzimmer und in der Schloofschdumm hot’s ausgschaud, wie wenn a Bombm exblodierd iss - olla Schubbs woan aufgerissn, greiz und quer iss dess ausgeraamda Geraffl rumgeleeng, und der Schmugg woa weg! "Hold mich fessd", hot die Fraa zer ihrn Oldn gsochd, wie’sa dess Chaos gsehng hot, "ich hob ganz waacha Gnie!" Im ganzn Verrdl iberleeng etzerd die Leit, wie’sa sich geecher die Einbrecher am bessdn wehrn kenna: ob’sa zusätzlich zer die Bolizeikondrolln nuch a Birgerwehr aufschdelln solln, wo nachds immer zwa Mann mit der Daschnlambn und an Beesballschleecher darch die finsdern Schdraßn baddruliern und ob doochsiiber vielleichd sogoa der Obba hinder der Gardina draußn die Schdraßn beobachdn muss - obber auf a sedda radikala Iberwachung hamm’sa dann doch verzichd.
Ollerdings hot bei die direggdn Nachbern neber den ausgeraaberdn Haus a Fraa gleich a subber Idee
geecher die Einbrecher k’habd. Sie hot an Laab Brod inna miteran Leffl ausk’heeld - und in dess Loch im Brod ihra sämdlichn Schmuggschdiggla neigschdeggd; die deiern Ohrring, drei goldna Halskeddla, an weerdvulln Armraafn und den herrlichn Brilland-Ring, woss’sa von ihrn Mo zur Silberhochzich gschenkd grichd hot. Dann hot’sa dess Brod samsd denner deiern Breziosn vorsichdich in die Diefkiehldruha neigeleechd. "Do drinna", hot’sa zer ihrn Oldn gsochd, "iss mei Schmugg sicher - auf die Idee, dass meina Weerdsachn bei minus 20 Grod Celsius ineran Laab Brod in der Diefkiehldruha verschdeggd sänn, kimmd net amoll der raffinierdsda Eibrecher!"
Wenn’sa etzerd ollerdings mit ihrn Mo ins Deooder, ins Konzerd oder afera feierlicha Baardy gedd, muss’sa hold vorher immer die goldna Ringla, Armraafn und Halskeddla ausn gfrorna Brod rausbobbln und in der Baggrehrn erschd aweng aufwärma - sinsd schdelld’s ihr, wenn’sa sich vorm Schbiegl aufbrezld, vor Källd die Gänshaud auf! Gerch
