Die Manuela hot sich kerzlich an kerninga Schnubfm eigfangd, obber weecher so an Dreggla gedd’mer ja net gleich zern Doggder, sondern browierd erschd amoll die Hausmiddl von der Oma aus - wassd scho: Bfefferminz-Dee drinkn, olla zwa Schdundn mit Kamille inhaliern, Obsd mit vill Viddamin C essn! Obber nooch zwa Wochn woa der Manuela ihr Nosn immer nuch dichd. "Ich hob dess Gfiehl, dass mei ganzer Kobf innerlich ausbeddonierd iss", hot’sa gejammerd - net amoll die Zigereddn hamm ihr mehr gschmeggd. Ban Kaffegränzla hot ihr dann a bensionierda Religionslehrerin embfohln, dass’sa amoll sedda Nosn-Schbiilunga machn soll, wie’mer’sa in Indien ban Ayurveda und ban Yoga kennd. "Do gibd’s fei in Bareith an aldernadivn Abodeecher", hot die Fraa gsochd, "der kennd sich mit seddn Zeich aus."