Weiwer schbringa ja gern aferan neia Mode-Drend o - aa wenn‘sas schbeeder bereia. Mei Nachbera Hanna leffd zern Beischbill heid nuch aweng schwer, wall’sa ols jungs Maadla immer mit 20 Zendimeder hoha Bladdoo-Schuh rum gschdelzd iss, die wossn frieher moll der letzda Schraa gewesn sänn. Leider iss die Hanna damols beieran wildn Danz in der Disco mit ihra gfährlichn Schuh umgekibbd und hot sich na rechdn Gnechl gebrochn - und heid wunnerd’sa sich, dass ihr Enkerla Sarah-Chantal die gleing Gene in sich hot wie sie selber. Fir die Oma iss jednfolls der Sarah-Chantal ihr Hang zur originelln Mode manchsmoll sehr mysderjees.