Do in Hof, wo des Schlabbmbier und die Hofer Filmdoch ihrn Urschbrung ham, wos na schenn Untreusee und na herrlichn Theresienstein gibbd und a die Saal, die romadisch dohiebläddscherd, is schee. Bluß die Briggn drieber machn die Grätschn. A zeidlang is scho her, mindesdns sechs Johr, wo des mid na Primus und der Briggn bassierd is. Der Primus is a alteigsessener Hofer, der fährd scho sei Lebdoch mid seiner Nusscholln, die er sei „Saale-Sau“ nennd, auf der Saal. Die Briggn am middlern Anger, die is zu derra Zeit grod gschberrd worn, wall’s offiziell khaaßn hod: wecher Baumaßnahmen! Alles is mid Schdahlzaun, rud-weißm Band und Schildern abgschberrd worn.