A boor Wochn is scho her, do is des erschda Windrod, des sich fasd 30 Johr gedrehd hod, obgebaud worn. 1995 ham sich do da Bund Naturschutz vo Hof und zirga 100 Brivodleit zamgedoh und ieber 130 Milliona Mark in die erschda Windgrafdanloch in Selbitz gleich hinder Lippertsgrie neigschdegd. „Mir worn die erschdn, in ganz Bayern!“, hod der Richard gebrohld, er hod damals nämlich a 25 Mark dazugschdeierd. Etzad is des Windrädla abgebaud, wall‘s scho old is und ganz schee geknerzd hod und sogor sich bei am gscheidn Wind moll selber abgschraubd hod. Etz kummd‘s nei ins Museum. 50 Meder mussdn sa nauf, um die Fliegl runderzubaua. Da Richard wor vo Anfang an dabei und hod zugschaud, wie sas sellmoll aufgebaud ham und etzad wor er a dabei, wie sas abmondierd und auf an Laster aufglodn ham mid Münchner Kennzeign. „Schee vorsichdich, gell, aufbassn,“ hod der Richard deligierd, „des is frängischa Inscheniörskunsd.“ Do is a gscheider Mo mid an Helm draaf und an Meder in der Händ zum Richard ganga und hod na erglärd, dass die a boor Rodorblädder und die Gondl ins deitscha Museum nach Münchn schaffn. Dass die ganza Welt des erschda Bürgerwindrod vom Bundesland beschdauna koh. Bissl wehmieddich wor da Richard scho und hod fier die ganza Mannschafd Leberkeessemmln und algoholfreis Bier besorchd. Wie die Diefloder a boor Schdundn schbeder weggforn senn, hod da Richard scho Wasser in die Augn khabbd. Immerhin hod ihm ja, mid an wesndlichn Bedrach, a Schdiggla vo dem Monsdrum kherd. Immer wenn Zeid wor, isser auf den Hiegl und hod dem Sound vo dem Riesenwindrod zukherd und ab und zu sogor amoll dazu gsunga. „Stimmen im Wind“ oder „Wind of Change.“ Richard wor mid Leib und Seel mid der Windanloch verbundn. Mid dem „Symbol der ländlichen Energie“, wieas immer gnennd hod. „Geh her do,“ hod der Baumasder midm Helm und bayerischn Dialeggd gsogd, „do hosd a Jahreskoardn fiern Eindridd ins Museum, nocherd is da Schmerz ned ganz so gruaß.“ Do hod sich der Richard dausendmoll bedangd. „Dei Windrodl werd ober wohrscheinlich erschd 2028 drinna schdeh, bissl Geduld brauchsd nuch!“ Da gegniggde Richard wolld nuch wissen, wos denn hiekummd genau. Do hod ihn da Bauleider ned weiderhelfn kenna: „Ober meisdns schdelln sa so Energiezeich zwischn die Solar-Panels vo der Nordsee und die Rasnmäher vo 1830 hie.“ Bis 2028 schaud sich etzad da Richard die Bilder oh, die er vo dem Windrod gmachd hod und singd mid feichda Augn dazu.