Der Gerch erinnert sich an das ausgebüxte Lama, das kürzlich durch Hof spaziert ist. Sein Kumpel hat dazu eine ganz eigene Theorie.
Letzdn Samsdooch hot in Hof a eigewerrds Lama den schenn Biergaddn von der Meinls Bas wohrscheins mit der beriehmdn Hochebene in den Andn in Peru verwechseld – und hot sich nooch der Auswanderung von Sidamerika iber Leimitz nooch Hof im Biergaddn middn zwischn die kahln Baamer ziemlich verdadderd sei neis Revier aweng ogschaud!
Nach der Werbung weiterlesen
Fir man Freind Willi, a Werrdshaus-Filosof ausn Verrdl, woa sofodd olles glor. „Dess Lama woa hunnerdbrozendich a Vorboode vom Glima-Wandl, der woss zerzeid die ganza Welld aufn Kobf schdelld“, hot’er mir aweng geheimnisvull mit leiser Schdimm verroodn. „Ich ko mich nuch genau erinnern“, hot’er dann sei Deorie nuch verfeinerd, „wie vor 20 Johr in Hof a Wedderforscher brofezeid hot, dass in unnern Fichtelgebirge schbeeder amoll Bambus-Baamer wachsn und dass’s in die Wälder Affn, Babbagei, Banana und gifdicha Schlanga geem werrd.“ Der Willi hot sellmoll fei gleich seina Langlauf-Schi auf vier Daaler zamm gseechd und die Breddla draußn im Gaddn am Kobfsallood-Beed ols Schneggnzaun aufgschdelld, damit sa wengsdns nuch a gscheida Verwendung grieng, wenn der Glima-Wandl kimmd. Und am Schdammdisch hot der Willi damols sei einga Version von der Hofer Zukumfd erglärd. „Ihr werrds derleem, dass dann die Leit in der Hofer Aldschadt im Safari-Hemm und mit Bermuda-Husn rum laafn, wenn‘sa karz vor Weihnachdn ihra Gschenker kaafn. Und im Radhaus hoggn unnera Schdadträd im bundn Hawaii-Hemm miteran Droobn-Helm aufn Kobf, wall’sas sunsd in derra Brieglhitz im Winder net aushaldn. Und zum Schluss hot er uns Schdammdisch-Briidern nuch an Atom-Schlooch versetzd: „Am Theresienschdein werrn Balma wachsn und draußn in Ossegg erndn die Bauern schdadds Erbfl Daddln, Kiwi und Abflsina!“
Die Erscheinung voneran Lama im Biergaddn middn in Hof iss jednfolls fir na Willi der Beweis, dass der Glima-Wandl scho eigedroffn iss. Wie ich na Willi kenn, werrd’er sich näggsda Wochn vorsorglich scho’moll selber a Hawai-Hemm und an Droobn-Helm kaafn – und nimmer am Untreusee schbaziern geh aus Angsd, dass am Ufer Groggodiler und Nil-Bfeer lauern…Gerch
