Heilichamd is erschd dann, wenn’s schneid oder wengsdns frierd und wenn die Familie sich einich is, wos zim Essn gibd. Beim Huberth daham hod sich die ganza Sibbschafd a Wochn vorm Heilichn Omd eigfunna, um des schwiericha Dema zu erördern. Die Oma wor am Kichendisch gsessn und hod Erpfl gschälld. Da Opa wor danem gschdandn und hod als erschder fachmännisch kommendierd: „Frieher hod’s Brodwärschd gehm und aus – ferdich!“ Na Huberth sei Fra, die Moni, wor mid am Zeddl in der Händ barad gschdandn um aufzuschreim, wos jeder hom will. Da Opa widder: „Ich ess olles, solangs warm is!“