Die Oma Ilse is mit ihrm Enkl, dem glann frechn Basti, zum Frisör ganga. Hald sura richdicher Oma-Ausfluch – mit Handdaschn und Bumbum und dem Vorsatz: „Heit mach ich mich widder schee!“ Da Basti wor nemdroh auf an Kinnerschdull gsessn und hod die Fieß baumln lossn. Er hod olles genau beobachtet: „Oma…warum hosdn du suran Umhang droh?“ „Dass die Hoor ned auf mei scheena Blusn draaffalln!“, hod die Oma erklärd. Der Gunga hod schlau gsogd: „Ober die senn doch eh scho draaf.“ Die Oma hod grimmich den Enkl ohgschaut, und dann ging’s scho los. Schneidn, Föhna und Toupiern – die Oma hod olles im Schbiegl genau beobacht: „Bissla kärzer…“ Die Frisörin hod die Scher nohkhaldn: „Naa, ned su karz, lieber vorn a wengla mehr Schwung… ja, genau… naa, des wor zuvill!“, hod die Oma dirigiert.