Hofer Spaziergänger Die Reizwäsch in der Hitzewelln

Gerch
Gert Böhm ist der „Gerch“ Foto: Archiv/Böhm Gert 2020, von Dorn.jpg

Frage für Kenner: Darf man 30-Grad-Wäsche bei sommerlichen 40 Grad zum Trocknen aufhängen?

 
Schließen

Diesen Artikel teilen

Ganz Deitschland waggld, wall in der Ugraine Griech iss, walls ka Gas gibd, walls Benzin so deier iss und wall uns der Glimawechsl verriggd machd. Obber goddseidank gibd’s in unnera Region a boor erfohrna Werrdshaus-Filosofn, die woss uns immer widder Muud machn fir die wichdinga Brobleme im normaln Leem. Zern Beischbill hot bei derra Briiglhitz in der letzdn Wochnn der Alois, der woss an gewissn Ruf ols „Frauen-Versteher“ hot, am Schdammdisch die elemendara Frooch gschdelld: „Derf’mer die embfindlicha Wäsch, die woss in der Maschina min 30-Grad-Brogramm gewaschn werrn muss, anschließnd draußn in der Hitzewelln bei 40 Grad aufhänga?“

Die Schdammdisch-Briider hamm geglotzd wie die Aachhernla, wenns blitzd. Obber der Alois hot seina eigewerrdn Kumbl gleich aufgegläärd. „Dess bedriffd vor alln eiera Weiwer“, hot’er gsochd, „denner ihr Reizwäsch samsd Danga, seidna Schlibfer und BHs verdreechd neemlich net merra wie 30 Grad, sinsd laafn’sa ei – und dess scheena Zeich werrd um aa oder zwa Nummern glenner!“ Dann hot der Alois obber gleich verroodn, woss’er selber geecher a sedda Gfohr dahamm gemachd hot. „Wie mei Olda ihr Reizwäsch bei 30 Grad in der Maschina gewaschn und dann draußn im Gaddn bei 38 Grod zern Droggna aufk’hängd hot, bi ich vorsichdsholber olla fimf Minuddn selber naus ganga und hob die Heesla und BHs an der Leina immer aweng gedehnd, damit’sa net eilaafn“, hot’er sei Reddungs-Aggzion gschilderd.

Woss der Alois ollerdings net wissn konnd: Der Nachber hot na hindern Vorhang bei derra sehr verdächdichn Handlung genau beobachd und iss sich hunnerdbrozendich sicher, dass sich der Alois auf seina oldn Dooch ineran Fedischisdn verwandld hot. „Häng bloß dei Reizwäsch nimmer draußn im Gaddn auf“, hot der Nachber sei Olda gewarnd, „sinsd kimmd der Lusdmolch aa zer uns riiber und bedaddschd dei erodischs Zeich“.

Bilder