Die Liesbeth wolld scho lang was fier ihr Figur machn. „Wenn ich na ganzn Dooch am Schreibdisch hogg, merg ich, wie mei Sitzfleisch immer merrer werd“, mahnd sa. Also hod sa beschlossn, im neia Johr Fidness zu machen, um a boor Pfund runderzugrieng. Ihr Mo hod a scho gsogd, dasse auf die Bilder vo frieher aweng annersch aus-gschaud hod. Die Frooch wor bluß, wos fier a Schbord zu ihr bassn kennd. Wichdich is des Abnehma, des schdedd an erschder Schdell, bissla Musglaufbau, wengla Brofil miecherd sa a hom und nadierlich Ausdauer, um besser Lufd zer grieng, wenn sa die Drebbm naufged. Ober zer anstrengend derf’s ned sa! Als Kind hod die Liesbeth jeds Dreening midgmachd. Vo da Leichd-adledig iebers Dischdennisschbilln bis hie zum Handball. In der Schull hod se nur Ehrn-urkundn mid ham gebracht. Aber etzad is hold ka Zeid mehr fier reglmäßiga Leibesübungen, wie ma frieher gsogd hod. Ihr Freindin, die Melanie, hod ihr gsogd, a Fra im middleren Alder machd etzterd Wassergymnastig, „Nordic Walking“ oder Wörg-aud, „Bauch, Beine, Po“ haßd des.