Es woa Sonndooch – und dess glana Dorfwerrdshaus woa zern Middooch-Essn widder gerammld vull. Aus der Schdadt und ausn Umgreis sänn die Leit kumma, wall hold die Rulladn, der Schweinsbroodn, die Glees und dess Graud immer goa so gud schmeggn – und net vill kossdn. Drinna im Werrdshaus hot im Kachl-ufm dess Feier gelunnerd, und die Gässd hamm gschwitzd, dass ihna die Brieh hindn und vorn rogeloffn iss. Sogoa die Fensder hamm in derra Hitz dermoßn mitgschwitzd, dass‘mer darch die ogeloffna Scheim goa nimmer ins Freia nausschaua konnd – es woa wie a Vorgschmagg aufn Glima-Wandl.