Die Doggdergschichdn senn immer aufs Neia schee zu derzälln. Wennsd in am Waddezimmer hoggsd und denna Leit zuhorchsd und zuschausd, kennd ma mahna, do wern Deaderschdiggla aufgfierd. A Baziend hod verzweifld a Gadrob für sei Jaggn gsuchd. Wie die Schbrechschdundnhilf des gseng hod, hod die gans emotionslos gsogd: „Do driem kenna sa sich aufhänga!“ A annera Schwesder hod beim Bludnehma ganz laud „Ohzapfd is!“ gebläggd, und wie a Fra ferdich wor, isse mid „Bessern se sich, gell!“ verabschied worn. Die Baziendn senn do scho ah dangbar, dass se so lustich ohgred wern, na is die schlimmsda Krankheid leichter zu erdrong.