In Hof fälld wichtigs Zeich immer auf an Sundich: Kerng, Frieschobbm, da Friedhofsgang und, wenn’s ohschdedd, a Wahl. Su werd des Braggdischa mid den Gewohnheidn verbundn. Wie an dem Sundich ah. Die Beate, die Fraa vom Gunter, hod scho olles gregld. Wennsd vom Frieschobbm ham gehsd, leffsd ieber na Friedhof und dusd a boor Blumma zum Vadder an die Urne hieleng, danoch nimmsd die Kuverts vo da Briefwahl mit und hausd sa im aldn Schulhaus in die Wahlurne nei. Da Gunter hod gniggd, hod sein Mantel noh und is los. Wiea dann nochm Frieschobbm vom Wärdshaus naus is, hodder in da linkn Händ die Wahlunderlagn khabd und in da rechtn die Blumma. Am Friedhof wor’s heid ruhich, hodder sich gedachd, wohrscheinlich wall Wahl is. An da Urnenwänd isser dann schdehgebliem und hod vor sich hiegflüsdert: „Vadder, heid geh ich wähln!“ Dann hodder die Briefwahlunderlagn neber da Urne in an Schlitz gschdeggd und is schnurschdraggs Richtung alds Schulhaus marschierd. Kunnd da Gunter alles laafm. Im Schulhaus is ihm auf amoll aufgfalln, dasser bluß nuch die Blumma in da Händ hod. Do isser unruhich worn und hod sich gedachd: Ich koh doch ned die Blumma in die Wahhlurne schdeggn, do bassd doch wos ned. Dann is da Groschn gfalln: Er hod die Kuverts zur falschn Urne gebrachd. Dodal heggdisch isser zum Friedhof zariggrennt und hod ieberlechd, wie er den Friedhofswärder erglärn soll, dasser aus Versehn die Demokratie zu seim Vadder in die Urnenwänd neigschmissn hod …