Da Werner is a 58er-Johrgang und bei da Schdadt ohgschdelld – na halbm Dooch im Bauhuf und an halbm Doch am Amd. „Rüsdich und ärberdsfähich“, wiea immer sogd. „Ich bie wie a boor Brodwärschd vom Volgsfesd: außen hadd, inna worm!“ Sei Gunga, da Linus (11), hod Ferien und will ins Freibod. Da Werner eigndlich ned so, wall er vo dem Chlor immeramoll an Ausschloch grichd. Und bei die Bikinimadla schiessd sei Blutdruck in die Höh! Ober als moderner Vadder gedd ma do scho mid. Bodschlabbm no, Underhemd runder, Bauch raus – auf gedd’s ins Freibod. Gleich wie sa ohkumma senn, wolld da Gunga auf die langa Rudschn. Da Werner schaud des Ding oh und scho senn seina Mundwingl nach undn grudschd: „Die Rudschn is ja länger als die Salzboh in Bad Reichenhall und beschdimmd 14 Meder hoch! Des is fei nix fier Leid mid Bandscheimvorfall und Bludverdünner.“