Am Schdammdisch hod da Reinhard beim Friehschobbn die Zeidung glesn und zu seina Kamerodn gsogd: „Da Hofer Schdadd-rod hod widder sura Ding vom Schdobl glossn.“ Die neigierichn Schdammdischbrieder hom konzendrierd zu-ghorchd. „Ma miss ka Hundeschdeier mehr zolln, wenn dei Gläffer a duda Wildsau auf-schbiern koh, die an ana afrikanischn Schweinepest gschdorm is.“ Do hod da Walter sofod gmahnd: „Des is a Aprilscherz, oder?“ Da Reinhard hod sein Kopf gschiddld und „Do schdedd‘s schwarz auf weiß, außerdem is Oktober!“ als Andword gehm. „Mahnsd, dei Fifi koh des ah? Dann schborasd dir deina 75 Euro im Johr“, hod na da Uwe grodn. Beim Reinhard ham die Gehirnzelln gebrodld. Ma hod ihm scho ohgseng, dasser sich des vorschdelln koh. Sei Fifi is zwor bluß a glaaner weißer Pudl, ober des is ja egol, welcha Rassn des koh. Da Heiner, da Schdammdisch-Filosof, is ah draaf eiganga: „Der Hund brauchd do aber scho a guda Ausbildung derzu, die Schnauzn miss do gscheid dränierd wern.“