Helmut Kitter erinnert sich an sein erstes Fahrrad. Das war ohne Gangschaltung, bereitete dafür aber umso mehr Freude.
Wöi iech maa äierschts Radl kröigt ho, daou woare am End sua ebber fimf. Zavor howe an Roller ghat, ower oin, dean waou ma haout selwer oaschubbern möin. Daou haoutsara as Hulz gebn, ower ich ho oin as Metall ghat, mitara Brems. Daou bist min Fouß hint afs Schutzbleech, und scha kunntst as Tempo rechaliern wöi heintzatooch mitaran Tempomat inaran Mercedes.
Hinawieder haout oins va de annern Kinner an Treetroller ghat, ower des woarnara niat vüll, und herborgt hamsen niat, und bremsn kunntn se aa niat. Döi ham funkzioniert wöi döi olwern Taschnlampn, wennsd döi schnurrn haoust laoua, hamse brennt, ower naouara Minuun ham da de Finger wäih taou.
Heintzatooch wenn a Kiend a Radl kröigt, mou’s Stitzradla hintn droahobn, weecher da Balangs. Iech ho koine bracht, ower meine Boina ham va dean 24-Zoll-Radl niat bis ganz oiche af de Bedaln glangt, obwohln maran Sattl ganz nieder montiert ham. Daou haout da Onkl Max gholfm. Mit aweng Draouht haouta oa jedara Bedaln zwa Hulzkletzla higmacht, naou kunnte oichelanga und laous is ganga. Iech ho ma denkt, da Onkl hölt me scha hint fest, dasse niat imfall, und bi laousgsaust. Howe denkt. Ower der haout blaouß hintndraagschaut, und wöis aweng berchaaf ganga is, haouts me gstrichn. Ho selwer gstaunt, wöi schnell dass e as Radlfoahrn glernt ghat ho.
Spaater howe dann an Vatter saa Radl kröigt, waal der woar Soldat. Mit dean Rod kunnte ins Schwimmbad foahrn, moußts ower ospeern, dass niat klaut worn is. As Problem woar de Luftpumpm. Oftamal hamse da de Luft aasglaoua, oder gaouaras Vendül klaut. De Pumpm kunntst niat droalaoua, döi waar weeg gwesn. Dees Foahrrod haout alle Schikana ghat: Lampn, Ricklöicht und Dinamo. As Bodzeich haoust afm Gebäcktreecher gschnallt. Gangschaltung haouts sellmal aa nune gebn. Berchaaf bist halt ogstiegn, oiwarts haoustas laffn laoua. Daou hamaramal a Radltour gmacht und hoimwartse wolltma am Hoama van Bauriedl aakäihern afara Limo. Va Häichstood is nea sua gloffn, ower de Straouß woar sellmal nune teert. Daou bine mit hunnert oder sua afara weng Soand kumma und wos solle sogn: der Sturz woar fülmreif! Blout howe wöia Sau. Alle zwa Knöi woarn aafgschorblt, und wennses seah wellts, koare enks heit nu de Narbn zeign!
Untern Kröich haouts ja hintavurn nix gebn. Vüll Leit ham ihre Radla in „Volksopfer“ ogebn, waal „Räder müssen rollen für den Sieg“. Oara neis Radl oder gaoua oaran naia Schlauch oder Roifn haoust iewerhapts niat denkn kinna. Fraouh haoust saa möin, wennsd Flickzeich in da Sattltaschn ghat haoust. Dees hama aa lerna möin, wöimaran Plattn flickt. Und Platte hama oft ghat! Woar da Roifm hi, hama unterlegn möin.
Mitarananer hama aa schäine Aasfliech gmacht. Unnare Radla warn alle afm neiastn technischn Stand: Knöischeimkompresser, Freilaaf, Ricktritt- und Hoandbrems, sinkronisierts Ein-Gang-Getriebe, Katzaauch, Gsundheitslenkstanga, Zweitonklensl, Sattl mit integrierter Fäderung, elektrisch Löicht vurn und hint. Waoun mir iewerall mit unnare Radla higfoahrn sen! Zan Beispül af Bobmgräi za da Pfingstagung van CVJM. In oin Tooch af Boareith in de Eremitaasch und wieder hoim. Afs Brunnafest in Waousiegl. Zan Zeltln oan Fichtlsee. Is berchaaf ganga, haout de oftamal a LKW iewerhult. Döi ham sellmal nune sua Haffm PS ghattn und woarn niat recht vüll schneller wöi mir mitn Radl. Daou hamaruns hint oighängt und an Berch affezöiha laoua. Unterwegs sen maramal aakäihert, und in dean Wirtshaus ham a poar Rentner ihrn Dämmerschoppn ghaltn. „Mir trinken unner Seidl niat wechan Durscht“, hamse gmoint, „sundern blaouß as Wollust!“
Wöie naou ölter worn bi, bine min Radl in de Arwat gfoahrn. In da Firma haouts aa Rodfoahrer gebn. Sette, waoun untn treen und uabn buugln. Daou dazou haoust ower koa Foahrrod bracht. Und afn Frei za meina ehemalichn Geliebtn af Schäiwal bine aa gfoahrn. Zan Tanz zan Beispül ins Gemeindehaus. Haouts blascht, bine mit mein Schatz afara Glaasl Wei ins Bscherer und ho de Manchester Knickerbocker durt trickna laoua. Sua haout mir as Radlfoahrn vül Freid gmacht und niat zaletzt aa zara goutn Frau vaholfn, mit dera waoue awaal scha iewer fuchzich Gaoua vaheiert bi. Waou gits denn dees heit nu? Heintzatooch wird ja iewerhapts nimmer gheiert, oder wenn, dann blaouß afara poar Gaoua. Daou helfm aa döi neimodischn Mauntnbeiks nix mit Fädergawl, Scheibnbrems und Gangschaltung. Foto: Patrick Pleul /dpa
