A unheimlicher Einbrecher

Der Willi iss zer frieh um dreia von der Schichd-Ärberd hamm kumma - und wall’er sich net gleich ins Bedd leeng wolld, hot’er nuch amoll na Fernseher eigschaldn: Basketball leif aus die USA woa dro! Der Willi hot sich grod aweng in san Sessl zerrigg gelahnd - do kimmd sei Olda ausn Schloofzimmer riibergewerchd. "Willi - heersd dä du net, wie unner Nachbera um Hilfe schreid?", hot’sa ganz aufgereechd gschriea. Der Willi hot erschroggn sofodd na Fernseher und dann dess Lichd ausgschaldn, iss vorsichdich auf die Derrassn nausgschlichn - und heerd driim die Nachbera ausn offna Fensder im erschdn Schdogg raus bläägn: "Hilfe, Hilfe - Bollizei! A Einbrecher will in mei Haus rei!"

Der Willi hot seina Ohrn aufgschdelld und vernimmd zwischn der Nachbera ihrn Gschraa werglich verdächdicha Graischer - wie wenn Einbrecher am Werk sänn! Do hot der Willi sofodd a Daschnlambm k’hulld und iss muudich in Kambf geecher dess finsdera Gschwerrdl gezoong: in der linkn Händ die Lambm - und in der rechdn Händ die Kurbl von der Derrassn-Markisn, damit’er im Ernsdfall zuschloong ko. Je näher der Willi ans Nachberhaus no kumma iss, umso deidlicher hot’er die Graischer vom Einbrecher k‘heerd, obber gsehng hot’er nix. Aferamoll sichd’er auf der Nachbera ihrer Derrassn an offna Millbeidl lieng - und rundrum lauder Abfall. Bei den geheimnisvulln Anbligg hot der Willi gleich aweng waacha Gnie grichd, sei Buls iss auf 180 nauf - und bletzlich schdedd’na der Einbrecher im Lichdkegl von der Daschnlambm leibhafdich geengiiber: Es woa a glaner Igl - zwischn die dinna Vorderfiißla hot’er a leers Eelsardina-Bichsla k‘holdn, wo er hungrich dro rum gegnabberd hot, dass’s auf die Derrassn-Fliesn geglabberd hot wie karz vor an Einbruch … Gerch