Um den elendn Corona-Virus zer schdobbn, hamm inzwischen scho 16 Milliona Deitscha die "Warn-App" auf ihr Händy naufgeloodn - a komblizierds Ding, wo der Oddo Normalverbraucher ohne Nobell-Breis bloß "Bahnhof" verschdedd.
Wennsd obber drotzdem wissn willsd, wie die Äbb fungzionierd, mussd im Internet do noochschaua, wo ich aus berseenlicher Erfohrung wass, dass aa an Bleedl aweng k’holfn werrd: in der "Gebrauchsanweisung in leichter Sprache" - do haaßds neemlich: "Die App prüft, ob Sie in den letzten 14 Tagen einer infizierten Person begegnet sind. Wenn das so war, dann bekommen Sie auf dem Handy nützliche Hinweise - zum Beispiel: Sollen Sie einen Corona-Test machen oder nicht?"
Dess Deema iss nadirlich aa fir den Freizeid-Kegl-Glubb "Alle Neune" wichdich, der woss seid 45 Johr ausschließlich aus Weiwern beschdedd. Und wall die massdn scho um die 80 rum sänn, iss dess ganza Gschwaader net nur a frehlicha Kegl-rundn, sondern aa a "Hochrisiko-Gruppe" - obber fei net bloß weecher Corona, sondern wall die massdn oldn Damen in unnera digidaln Welld nuch aweng "im Tal der Ahnungslosen" leem. Ka Wunner, dass die Vorsitznda von derra subber Drubbn, die old Trudi, aufbassd wie a Schießhund, damit ihrn Kegl-schwesdern nix bassierd - do werrd sogoa die Kugl miteran Sagrotan-Labbn gewissnhafd desinfizierd, bevor’mer sa in die Händ nimmd und in die Keglbohn neirolln derf. Kerzlich hot sich die Trudi vom Schwiechersohn aa die "Warn-App" auf ihr Händy naufloodn lossn. Ollerdings iberschätzd’sa maßlos, woss die Äbb iberhabsd ko - dass dess Händy werglich bloß dann Alarm gibd, wemmer in die letzdn verzer Dooch amoll ana infizierdn Berson begeengd iss, iss in der Trudi ihrn Hirnkässdla leider nuch net okumma. Sie iss iberzeigd, dass sämdlicha Menschn in ihrn Umgreis gsund sänn, wenn ihr Händy net blinkerd oder brummd - hold ähnlich wie bei die Kondrolln am Flughafn, wemmer darch die eleggdronischa Schleusn geh muss.
Drotz denner gfährlichn Corona- zeidn sorchd die Trudi ban Keglamb jedsmoll fir a guda Schdimmung. Sie schdelld ihrn Keglschwesdern sogoa immer moll a Rundn Marilln-Likeer rei, damit dess Virus aa innerlich aweng bekämbfd werrd. Obber die wichdigsda Abwehr geecher Corona machd die Trudi bei jedn Kegl-Amd immer gleich am Anfang: Olla Weiwer missn sich nooch der Begriißung erschdmoll im Halbgreis aufschdelln - und dann fuchdld die Trudi mit ihrn Händy aweng in der Lufd rum. Anschließnd machd’sa an Kondrollbligg aufs Disblee vom Händy und gibd sofodd dess Ergebnis von ihrn Schnelldessd bekannd: "Ihr sädd ollazamm bumberlgsund!" Etzerd ko sich die fidela Hochrisiko-Grubbn beruhigd na Marilln-Likeer zuwendn und vuller Schwung zern kegln ofanga … Gerch
