Der Benno lebbd zwoa middn in Hof, obber sei ganzer Schdolz iss a herrlichs Grundschdigg aneran Waldrand draußn im Landgreis - miteran Gaddnhaisla und an Brunna.
Der Benno lebbd zwoa middn in Hof, obber sei ganzer Schdolz iss a herrlichs Grundschdigg aneran Waldrand draußn im Landgreis - miteran Gaddnhaisla und an Brunna. In dess glana Baradies hot’er kerzlich bei der gressdn Hitz fimf Kumbl zern Grilln eigeloodn. "Ich leech etzerd gleich Brodwärschd und a boa Wamma auf - und außerdem hob’ich a Fässla Bier mitgebrachd", hot’er bei der Begriißung zer seina begeisderdn Freind gsochd.
Bevor der Max na Grill ogschierd hot, hamm’sa olla mitnanner dess 20-Lidder-Fässla Bier ausn Kofferraum vom Benno san Audo raus bugsierd und zum Brunna gschlaafd, wo’mer in zehn Meeder Diefn dess glora, kolda Wasser sehng konnd - und genau du drundn wolldn’sa etzerd ihr Fässla kiehln, bis die Brodwärschd und Wamma ferrdich gegrilld woan. Also hamm’sa um dess Fass die greiz-die-quer an langa Eisndrohd rum gewiggld und dann die ziemlich komblizierda Drohd-Konschdrugzion miteran diggn Saal zamm gebundn. Anschließnd hamm’sa ihr kossdbora Frachd am Saal schee langsam zum Brunna nunder gelossn. Wie dann dess Fässla im koldn Wasser im Brunna drinna geleeng woa, hot der Benno na weidern Ablauf genau ergläärd. "Mir missn aufbassn, dass uns dess Saal net in Brunna nei fälld", hot’er gsochd, "dessweecher muss hoom am Brunna-Rand immer aaner von uns schdeh und dess Saal an der Schlaafn fessdholdn".
Leider iss dann aweng a Ungligg bassierd. Wie neemlich noochera verrdl Schdund der erschda Wachbossdn dess Saal an san Kameradn ibergeem wolld, iss ihna dess Saal aus die Händ geruddschd und in Brunna nunder gfalln. Etzerd woa nadirlich Maddäus am Letzdn: heroom die Mannsbilder, jeder miteran ausgederrdn Hals - und drundn im Brunna unerreichboa dess Fässla Bier. Obber bevor echda Männer aufgeem und wie in der Sahara elend verdarschdn, werrn in ihra Kebf zum Iberleem scho immer gewoldicha Energien frei - so woasch aa im Benno san Grundschdigg! Die Mannsbilder hamm zur Reddung sofodd ausn Gaddnhaisla an Rechn k’hulld, hamm na aneran langa Schdrigg no gebundn und dann vorsichdich ins Brunnawasser nundergelossn. Anschließnd hamm’sa mit grußer Geduld browierd, ob‘sa drundn im Wasser min Rechn am Schdrigg dess abgschderzda Saal an der grußn Schlaafn derwischn und nauf ziehng kenna. Nooch ana halbn Schdund hot’s werglich geglabbd - und die Männer hamm schließlich mit laudn Jublgschrei ihr gelibbds Fässla wie an Goldschatz ausn Brunna nooch oom gezerrd. Womidd widder moll bewiesn iss: Wenn Mannsbilder am Verdarschdn sänn, werrn’sa gigandischa Erfinder … Gerch
