Der Braunbär iss aufm Weech zu uns

Leit, macht eich draaf gfasst, dass dess Wandern im Fichtlgeberch demnäggst ziemlich gfährlich werrd: Der vom Schnappauf gsuchta Braunbär iss neemlich net auf der Flucht nooch Tirol, sondern wohrscheins isser unterwegs nooch Nordn – rauf zer uns! Es gibt zwa guda Grind, warum dass der Braunbär unbedingt in unner Region kumma will. Der Tröstauer Berchermaster Martini hot doch scho lang den Plon, dass in der Näh vom Silberhaus auf 15 Hektar der Bärenpark Fichtelgebirge entschtedd, wosa den Urlaubern a Addrakzion bietn wolln, damit aweng Geld in die Kassa kimmt. Wennst miich freggst: Der eesterreichischa Betz lefft fei net zufällich in Richtung Fichtlgeberch rauf, sondern der schlaua Martini hot in die Wälder a Fährtn geleecht! Wohrscheins lieng in die Bischla olla 20 Meter a boor Gnaggwärscht, und der Bär dabbt auf derra Warscht-Fährtn schee langsam rauf zer uns, biser am Silberhaus okumma iss