Der Nickl im Schdau auf der A 9

Der Nickl und sei Olda hamm in Minchn Verwandta bsuchd - und am Sonndooch nooch na Middoochessn wolldn’sa mit ihrn VW Golf widder hamm nooch Hof fohrn. "Mir solldn vielleichd die Audobohn iber Rengsburch nehma", hot na Nickl sei Hanna vorgschloong, "auf der A 9 gibd’s doch immer so vill Schdaus". Obber der Nickl, der woss von sich iberzeichd iss, dass’er mit Abschdand der bessda Audofohrer auf der Welld iss, hot san Kobf gschiddld. "Woss verschdessd dä du vom Audofohrn", hot’er gleich gebelld, "hald lieber die Glabbn und verloss dich auf mich! Mir fohrn auf der A 9 hamm - iiich bin der Fohrer, hammer uns verschdandn?"

Nooch ana Schdund und 37 Minuddn sänn der Nickl und sei Olda auf der A 9 bei Greding ineran siem Kilomeder langa Schdau ols letzds Audo hindn okumma. A holba Schdund lang iss kan aanzichn Zendimeder vorwärdsganga. Im Nickl san Audo woa a brenzlicha Schdimmung: kaner hot a Werrdla gsochd - der Nickl hot bloß schdumm und grimmich vor sich hie gschaud, wie wenner vorhin nooch na Essn ols Dessäär a Schdiggla Fichdlgebirgs-Granidd gessn hot. Ringsrum sänn inzwischn scho a haufm Leit middn im Schdau ausn Audo ausgschdieng und hamm aufm Middlschdraafn ohne Maskn aweng mitnanner geblauderd - so a Schdau hot ja aa seina angenehma Seidn, wall’er wildfremma Menschn aweng zamm brängd.

Obber dann iss der Nickl haaß worrn! Er hot neemlich gsehng, dass rechds neber der Audobohn a glana Schdraßn verbeifiehrd, wo dauernd a boa Audos gfohrn sänn. Miteran Bligg auf die rechda Leitblankn hot’er zer seiner Oldn gsochd: "Ich hull etzerd ausn Kofferraum an 17er-Schlissl raus - und dann schau’mer weider!"

Zwa Minuddn schbeeder hot der Hobby-Handwerker Nickl ausn Werkzeichkassdn san 17er-Schraumschlissl raus gfingerd und hot die rechda Leitblankn langsam, obber sehr fachmännisch abgschraubd. Die abmondierdn Schraum hot’er aanzln neber an Bfossdn abgeleechd. Anschließnd hot’er die Leitblankn aus der Verankerung rausgezerrd und neemdro ins Gras gschmissn, iss dann widder in san Golf eigschdieng, hot Gas geem und iss rechds darch die frisch gschaffna Luggn von der Audobohn rogfohrn. 50 Meder ging’s min Golf darch die Wiesn, dann iss der Nickl auf die freia Landschdraßn eigeboong und woa ausn Schdau draußn - hinter ihn hot sich sofodd die riesicha Audoschlanga no k’hängd.

A boa Minuddn schbeeder - der Nickl woa karz vor Nermberch scho widder auf der A 9 zerrigg - hamm’sa im Radio gemeld, dass sich der Schdau bei Greding bletzlich ganz schnell widder aufgeleesd hot … Gerch