Der Urlaub hot gleich schee ogfanga

Dahamm erledichd’er seina Iberweisunga bei der Schborkassa am PC mit e-Bänking, er hot a Seniorn-Händy mit exdra grußa Dassdn fir seina diggn Warschd-Finger und weecher seina schlechdn Aang - und letzda Wochn hot’er an mordsdrumm Koffer fir san Urlaub kaafd, obber gleich miteran eiserna Zohlnschloss, damit am Flughafn oder im Hodell ka Dieb na Koffer aufmachd und na Edwin seina Nylon-Seggla, die Kern-Saafn oder seina drei Hawai-Hemmer glaud. "Sechs Ziffern hob’ich sofodd dahamm ols Cood eigeem", hot’er vuller Schdolz am Schdammdisch derzelld, "obber fei kana so brimmidivn Zohln wie man einga Gebardsdooch, sondern scho aweng woss Komblizierds, wo ka Fremmer draaf kimmd!" Ollerdings kenna fei sedda bsonders schlau ausgediflda Geheimnummern manchsmoll zum Broblem werrn - wie der Edwin inzwischn selber wass.

Bei der Ankumfd am Flughafn in Mallorca hot der Edwin san einbruchsichern Koffer vom Gebäggband rogezerrd und wolld am Ausgang grood am Zoll verbeigeh - do hot na a uniformierder Mo aufk’holdn. "Bitte Koffer auf", hot der Zellner freindlich gsochd. Der Edwin hot sich in seiner gudn Urlaubslaune sofodd iber sei Zohlnschloss gebeigd - er hot ja nix Verboodns dabei k’habd. Obber dann iss na fei des Lächln gleich verganga: Der Cood vom neia Zohlnschloss iss na ums Verreggn nimmer eigfolln - die subber ausgedachdn Geheimzohln woan auf san Schbeicher im Hirnkässdla erschetzwie gelöschd! "Legg mich doch greizweis am Oasch", hot’er in Erkenndnis von derra glan Kaddasdrofn vor sich hie gebrummld. Ihm iss bloß nuch eigfolln, dass die Geheimzohl a wichdigs Daddum woa, obber er wussd nimmer, woss fir aans. Noocherernanner hot’er na Gebardsdooch von seina sechs Enklkinner eigeem, dann san Hochzichdooch und anschließnd na Scheidungsdooch, sogoa die Dellefonnummer vom Werrdshaus hot’er in seiner Verzweiflung browierd - obber dess Schloss iss net aufganga. Af zerlezd hot a Zellner a Beißzanga k’hulld und dess Schloss einfach aufgezwiggd. Dann hamm’sa na Edwin san Koffer nooch Heroin und wer-wass-woss durchsuchd - und nadirlich nix gfunna. "Alles ok", hot der Zellner zern Edwin gsochd, obber iber an seddn Befund konnd der Edwin bloß aweng mit die Zeh gnerschln. Er hot dann san kabuddn Koffer samsd Hemmer, Husn, Jaggn, Sandaln, Soggn, Schnorchl, Daucherbrilln und Flossn nuch a holba Schdund lang ban Zoll debbonierd, wall’er sich neemdro in der Halln ols Ersatz a riesicha Reisedaschn kaafn mussd - mit Reedla zum Rolln, obber ohne moderns Zohlnschloss … Gerch

—————

www.frankenpost.de

www.gert-boehm.de