Na Fritz sei "selbstfahrender Rasenmäher"

Und wie’er kerzlich amoll bei 30 Grod im Schaddn ausn Kichnfensder in san Gaddn naus gschaud hot, iss’na eigfolln, dass ja sei Rasnmeher dringend widder amoll a Inschbeggzion brauchd. Etzerd muss’mer wissn, dass na Fritz sei Rasn in der ganzn Nachberschafd beriehmd iss: olles immer frisch gschniddn, aa Grooshalm iss wie der annera, ka Gänsblimmla schdeerd die griina Brachd - der ganza Gaddn machd na Eindrugg wie ausn Bilderbuch. Der englischa Rasn in Wimbleddn iss a Dregg dageecher! Und damit dess Gärrdla immer ausschaud wie geleggd, hot sich der Fritz vor zwa Johr sogoa an "selbstfahrenden Rasenmäher" kaafd.

Der Fritz hot also dess dechnischa Zauber-Gerääd in der gressdn Briiglhitz ausn Schubfm raus k’hulld und zur Generol-Iberholung auf die Derrassn gschlaafd. Dann hot’er sämdlicha Drehdla und Leitunga sauber gemachd, hot dess Eel gewechsld und olles schee gebutzd. Zerletzd hot’er sogoa die Messer ausgebaud, frisch gschliffn und dann widder fessdgschraubd. "So", hot der Fritz dann sei Ärberd wohlgefällich bedrachd, "dess hädd’mer widder".

Dann hot’er in den Rasnmeher Benzin eigfilld und wolld zur Kondroll, ob olles sauber leffd, na Modoor karz moll olossn. Der Fritz hot a boamoll am Schniirla gezoong, obber nix iss ogschbrunga. Der Modoor hot bloß olla boa Sekundn aweng vor sich hie gschdodderd - und dann: "aus die Maus!" Nooch na fimfdn Versuch iss der Fritz vuller Wuud in sei Karaaschn nei ganga, um fir die Rebbaradur an Schraum-Schlissl zer hulln. Obber wie’er grod in san Werkzeich-Kassdn rum suchd, heerd’er aferamoll ganz deidlich, dass draußn sei Rasnmeher brummd. Der Fritz iss wie a Blitz aus der Karaaschn raus gewerchd - und sichd scho von weidn die Kaddasdrofn: Der Modoor woa neemlich inzwischn ausn Schdoddern richdich ogschbrunga und hot na "selbstfahrenden Rasenmäher" in Beweechung gsetzd - erschd quer iber die Derrassn und dann kerzagrod darch die offna Schiebe-Diir direggd nei ins Wohnzimmer. Bis der Fritz endlich an der Diir schdand, woa scho olles zer schbeed! Auf den schenn weißn hochfloorichn "Hirtenteppich" im Wohnzimmer hot der selbschdändicha Robodder a 80 Zendimeeder braada Schneisn nei gemehd - genauso sauber und exaggd wie sunsd immer draußn im Gaddn. Vor die Aang vom Fritz woa der Rasnmeher etzerd hindn im Zimmer an der Wänd gschandn und hot leer vor sich hie geduggerd. Na Fritz sei Olda, die woss weecher den Modoor-Lärm aus der Kichn rieber kumma iss, hot gleich Rotz zer Wasser gegrinna. "Ach Goodla, mei scheener Flokati, olles abgemehd", hot’sa gejammerd - und der Fritz hot gfluchd wie a Berschdnbinder. Zwoa hot der Fritz 100 Euro an Warrdungs-Kossdn gschboord, obber leider mussd’er fir an neia Debbich nuch amoll an Dausnder draaf leeng - und na Fritz sei legendärer Ruf ols Heimwerker woa aa ban Deifl … Gerch