Der Hermann iss zwoa gelernder "Bürokaufmann", obber dahamm in der Familie hot’er sich ols Hobby-Handwerker aweng an Noma gemachd - er erledichd neemlich olla glan Rebberaduurn im Haus selber.
Der Hermann iss zwoa gelernder "Bürokaufmann", obber dahamm in der Familie hot’er sich ols Hobby-Handwerker aweng an Noma gemachd - er erledichd neemlich olla glan Rebberaduurn im Haus selber. "Dess kossd nix und gedd schnell, wall’mer net weecher jedn Dreggla ewich waddn muss, bis endlich amoll a Firma kimmd", lobbd die Lore ihrn Mo. Ollerdings schdeeßd der Hermann mit seina Handwerker-Einsätz manchsmoll aa an Grenzn.
Letzda Wochn hot’er mit seiner Fraa dess Wohnzimmer nei dabbezierd. Und wall sich bei derra Ärberd erwiesn hot, dass der olda Lichdschallder neber der Diir farblich nimmer zer die schenn neia Rauchdabbeedn bassd, iss na Hermann die Idee kumma: "Do wechsln‘mer den Lichdschallder gleich mit aus: Ich kaaf morng sofodd an neia Wibb-Schallder in Andrazidd, damit’s schenner sichd."
Also hot der Hermann am näggsdn Dooch na oldn Lichdschallder abgschraubd und wolld die drei dinna Kabl rausziehng. Obber die verrossdn Drehdla woan fessd drinna gschdeggd und hamm sich ums Verreggn net rauszerrn lossn. Dessweecher hot der Hermann olla drei Kabl mit der Zanga einfach abgezwiggd - olles fachlich einwandfrei. Obber leider hot’er sich dabei net gemerkd, welchs Kabl in wellern Anschluss drinna woa - und bei der Mondaasch vom neia Lichdschallder hot’er hold die abgezwiggdn Kabl einfach der Reiha nooch widder zammgeglemmd - es woa sowieso a ziemlichs Gebobbl. "So", hot dann der Hermanni zerfriedn gschdrohld, "dess hätt‘mer."
Nooch na Amdessn wolldn sich der Hermann und sei Lore im Fernsehng an Heimadfilm oschaua, obber leider hot der Fernseher kan Zugger gemachd. Die Fraa hot zwoa auf olla Gnebf auf der Fernbedienung rumgedriggd, obber dess hot nix genitzd. "Loss amoll na Massder no", hot der Hermann ergläärd und iss aus san bequema Sessl aufgschandn. Er hot die Gebrauchsanweisung k’hulld, hot olles aanzln darchgelesn und dabei dauernd an der Fernbedienung und am Bildschirm rum gedriggd und rum gedrehd, obber es woa wie verhexd: Der Fernseher iss ums Verreggn net oganga. Auf zerletzd wolld der Hermann nuch hindn am TV-Gerääd olla Kabl kondrolliern, ob’s vielleichd aneran Wagglkondaggd liechd. "Mach amoll Lichd", hot’er dessweecher zer seiner Oldn gsochd, "sinsd sieh ich nix."
Die Fraa iss zern neia Lichdschalter ganga, hot nauf gedriggd - und siehe do: Dess Lichd iss net oganga, obber aufm Fernseher woa a Bild do! "Mich leggsd am Oasch", hot der Hermann gemurmld, "do hob’ich wohrscheins aus Versehng na Fernseher ans Lichd no gekabld." San Mondaasch-Fehler wolld der Hermann obber nimmer selber rebbariern. "Dess iss’mer doch aweng zer riskannd", hot’er zugeem - und am näggsdn Dooch iss a Eleggdrigger kumma und hot olles widder in Ordnung gebrachd. "Goddseidank hossd du den Feller net selber rebbarierd", hot die Lore gegrinsd, "sinsd wäa vielleichd im Keller die Diefkiehl-Druha aufgedaud, während mir hinna im Wohnzimmer na Heimadfilm ogschaud hamm …" Gerch
