Zwa olda Waafn im Subbermarkd

Die Heidi iss mit ihra 76 Johr genau dess, woss die Hofer "a olda Waafn" haaßn. Sie kennd Godd und die Welld, gedd jeda Wochn zu drei verschiedna Kaffegränzla und hot im Lauf von ihrn Leem bei sich a Eingschafd endwiggld, die woss von ihra Verwandtn und Bekanndn gleichermooßn bewunnerd wie gferchd werrd: Sie heerd die Fleh hussdn und dess Groos wachsn! Ob in der Biblschdund, ban Seniorn-Dreffn oder in der Singschdund: Wenn die Heidi aufdauchd, derzelld’sa sofodd die frischn Neiichkeidn - immer schee gschbiggd mit dramaddischa Schilderunga und Vermuudunga, dass‘s ann ban Zuhorng gleich die Hoor aufschdelld. Iberdroffn werrd die Heidi heggsdns nuch von ihra Schweechera Gunda, die woss ols Widdfraa driim im Verrdl wohnd - die Gunda iss neemlich genauso a Graudwaafn wie die Heidi. Und wehe, wenn die zwa Laddschkabbn amoll zammdreffn - dann "servus Kaiser!"

Letzdn Middwoch woan die zwa Weiwer zufällich in der selm Schlanga an der Kassa im Subbermarkd gschdandn. Zwoa woan dazwischn nuch drei annera Kundn, obber die Heidi hot scho genau beobachd, woss die Gunda vorn olles aufs Band geleechd hot. "Du nimmsd etzerd woll doch widder na drei-brozendinga Moocher-Quark?", hot die Heidi hindn ganz laud zu ihrer Schweechera nooch vorn gebläägd. "Den hossd doch frieher immer so schlechd verdroong, dassd manchsmoll sogoa Dinnbfiff grichd hossd". So iss also aweng a Gschbreech iber der Gunda ihra Grankerdn in Gang kumma, dass rundrum die Leit ihra Ohrn gschbitzd hamm und am End ziemlich gud Bescheid wussdn iber der Gunda ihr Inkondinenz, ihrn Fußbilz und iber die medizinischn Ergebnisse von ihrer letzdn Darm-Schbiegelung.

Draußn aufn Barkblatz sänn dann die Gunda und die Heidi samsd ihra vulln Eikaafs-Weecherla nuch lang schdeh gebliem und hamm wichdicha Gedankn ausgedauschd - iber den komischn neia Undermieder von der Kusina, iber Nudln, Banana und Joggurd, iber Rollmebbs, riesicha Hundshaifn in der Leimitzer Schdraßn und iber dess fimf-loogicha Glo-Babbier, iber Kukident und rumänischn Landwein ausn Deddra-Bagg. Nooch ana halm Schdund iss‘s denner zwa dann doch aweng kold worrn. "Mir zichd’s außerdem scho widder in der rechdn grußn Zeha", hot die Heidi den Dialog abgschlossn, "wassd ja: Wenn’s Wedder umschleechd, schbiir ich gleich aweng die Gichd!"

Dann hamm sich die zwa Weiwer verabschied und sänn in verschiedna Richdunga zu ihra Audo abgedambfd - ollerdings ohne ihra reichlich gfilldn Eikaafs-Weecherla! Die hamm’sa vor lauder Waaferei middn aufm Barkblatz gladd vergessn… Gerch