A gschäfdlicher Vorsaz fiers neia Johr

An gudn Vorsatz häd der Hans ober scho. Er had vor ungefehr fünf Johr a Ärbschafd gmachd. Sei verschdormne Großdanda ,die Sigrun, had in ihr’m Desdamend dem Hans a elegdrischa Worschdfillmaschina hinderlossn, und nachdem er ja eh awengla a Fleisch-und Worschdfan is, had ihn des scho sehr gefreid. Aber bisher is nuch nix damid gmachd worn. Etzerd wehrs ober soweid. In dem Johr miecherd der „Unterkotzauer Pfefferbeißer“, so wie ihm seine Nachborn nenna, des Ding amol zum Einsatz bringa. Des solld sei Vorsatz im neia Johr sa.

Der Hans had sich schlau gmachd wos ma alles dazu brauchd und had eikahfd. Worschddarm, Gwärz, Pöglsalz, nadierlich an Schweinsbauch – soll ja ka Diädworschd wern. Genau nach Blan is alles zamgmischd und ferdich fürs Worschdn gmachd worn.

Beim Eikaafm wohr der Darm, wo des Bräd dann neikummd, im Angebod. 25 Meder fier 3,99 Euro: „A Schnäbbla gmachd“, lachd der Hans dazu und steggd die Ärbschaft an die Schdeggdodn no. Bissl schdaubich wors se, is aber geloffm. Gans vorsichdich werd der Billichdarm vorne an die Worschdsbritzn gschdüllbt und scho ging’s los. An ganzn Ahmer Bräd had er ohgmachd, damid a Vorrad do is.

Mensch, des is echd subber geloffn. Hans had des gmadschde Zeich ohm nei, und wie vo selber is vorne des schiere Fleisch in den Worschddarm gedriggd worn. A richdich scheens Wärschdla is vorn rauskumma.

Auf amol dud sich aber a Broblem auf: Der Hans had vergessn, den Darm ohzuschneidn, und des Wärschdla is immer lenger worn. Ohhaldn kunnd ma die Maschina ercherdswie a nimma. Also had der Hans den ganzn Ahmer mid dem Haggfleisch ohm neigschüdd. Erschd als die 25 Meder zer End worn, hod des Ding aufgherd zu raddern. A riesn Worschdschlanga vo 25 Meder wor etza doglehgn.

Aber der Hans had a geniala Idee ghabd. Wal er am Dachbodn drom nuch a leere Kabldromml lieng ghabd had. Is er nauf und hod die Wurschdannakonda auf die Dromml draafwiggeld. Der Hans hod des Grinsn nimma aus seim Gsichd griggd. A Vorsatz und a Gschäfdsidee. Do muss ma erschd amol drafkumma ...