Nooch na Amdessn wolldn sich der Hermann und sei Lore im Fernsehng an Heimadfilm oschaua, obber leider hot der Fernseher kan Zugger gemachd. Die Fraa hot zwoa auf olla Gnebf auf der Fernbedienung rumgedriggd, obber dess hot nix genitzd. "Loss amoll na Massder no", hot der Hermann ergläärd und iss aus san bequema Sessl aufgschandn. Er hot die Gebrauchsanweisung k’hulld, hot olles aanzln darchgelesn und dabei dauernd an der Fernbedienung und am Bildschirm rum gedriggd und rum gedrehd, obber es woa wie verhexd: Der Fernseher iss ums Verreggn net oganga. Auf zerletzd wolld der Hermann nuch hindn am TV-Gerääd olla Kabl kondrolliern, ob’s vielleichd aneran Wagglkondaggd liechd. "Mach amoll Lichd", hot’er dessweecher zer seiner Oldn gsochd, "sinsd sieh ich nix."
Die Fraa iss zern neia Lichdschalter ganga, hot nauf gedriggd - und siehe do: Dess Lichd iss net oganga, obber aufm Fernseher woa a Bild do! "Mich leggsd am Oasch", hot der Hermann gemurmld, "do hob’ich wohrscheins aus Versehng na Fernseher ans Lichd no gekabld." San Mondaasch-Fehler wolld der Hermann obber nimmer selber rebbariern. "Dess iss’mer doch aweng zer riskannd", hot’er zugeem - und am näggsdn Dooch iss a Eleggdrigger kumma und hot olles widder in Ordnung gebrachd. "Goddseidank hossd du den Feller net selber rebbarierd", hot die Lore gegrinsd, "sinsd wäa vielleichd im Keller die Diefkiehl-Druha aufgedaud, während mir hinna im Wohnzimmer na Heimadfilm ogschaud hamm …" Gerch