Die Wilma werblt durch Neihof

Mer derf ja dess Elend net leicht nehma, woss der Hurrikan do driem in Florida verursacht, obber ich will draaf aufmerksam machn: In unnera Verwandtschaft gibts fei aa so an Wirblschturm namens Wilma, und zwor iss dess die Widdfraa vom Bossd-Oberseggretär Hans. Der Hans wor immer a ruicher Kund, obber sei Wilma hotna dess Leem zer Hell gemacht, bis dasser karz vor seiner Bensionierung ban Schneeschorn zammgeglabbt iss. Olla hammsa sellmoll gsocht, dass die Wilma ihrn Mo aufn Gewissn hot – gemessn an derra oltn Bissgurn iss neemlich der gleichnoomicha Hurrikan in der Karibik a Dregg dageecher!Wo die Wilma aufdaucht, fanga die Verwiestunga o: Sie zicht iber ihra Nachbern her, verdächticht na Hans san Ärbertskolleeng, dasser sei Olta schwadd, wenner zer vill gsuffn hot – und im Subbermarkt sucht sa schtundnlang nooch Wärschtla und Fischkonservn, wo dess Ablauf-Daddum iberschriddn iss, wallsa dann an der Kassa lautschtark Rabbatz macht und ols Wiedergutmachung a boor Deesla gratis gricht