Der Kevin hot mit seiner Fraa a boor Dooch Urlaub in Bad Füssing gemachd – und in denner warma Dermen in ihrn Wellness-Hodell hamm’sa sich olla zwa subber erhoold. Obber wie der Kevin am driddn Dooch mit san nooglneia BMW die-greiz-die-quer in den Schdädtla rumgfohrn iss und a Dankschdelln gsuchd hot, wäa na fei die Freid an den schenn Urlaub fasd verganga: Auf ana enga Schdraßn iss‘na neemlich a Audo endgeeng kumma und hot na dermoßn weid nooch rechds abgedrängd, dass’er ban Ausweing frondal iber an schwarz-weißn Abgrenzungsbfosdn driiber gfohrn iss. Im Riggschbiegl hot obber der Kevin zer seiner grußn Iberraschung gsehng, dass sich der Begrenzungsbfosdn blitzschnell widder aufgerichd hot, wie wenn nix gewesn wäa. Der Kevin hot mit san BMW a Vollbremsung gemachd, iss ausgschdieng, hot sich dess Wunner aweng genauer ogschaud – und sei Urlaubsfreid iss gleich zerriggkumma. Der iberfohrna Bfosdn hot sich neemlich dessderweecher so schnell widder aufgschdelld, wall’er bloß aus waacher Blasdigg woa. Nooch den Erlebnis hot na Kevin im Hodell gleich aweng der Deifl geriddn – er wolld sei Olda amoll kernich derschreggn! „Mir machn etzerd in Bad Füssing a glana Rundfohrd min Audo, damitsd den Kurorrd aweng besser kenna lernsd“, hot’er in Gedankn an den beweechlichn Bfosdn verschmitzd zer seiner Oldn gsochd – und dann sänn’sa olla zwa mit ihrn schenn BMW losgfohrn. Erschd iss der Kevin ganz gemiedlich in den Schdädtla rumgekurvd, obber dann iss rechds am Schdraßnrand – wie vom Kevin gebloond – widder so a schwarz-weißer Begrenzungs-bosdn aufgedauchd. Den hot der Kevin miteran leichdn Grinsn ins Visier genumma, Gas geem und iss mit san BMW frondal auf den Bfosdn zugebredderd, dass neemdro die Fraa vor Schregg gebläägd hot wie am Schbieß – dann hot’s zwa mords Buscher geem: ann vorn an der Schdooßschdanga und gleichzeidich an zweidn inna im Audo, wall weecher den Aufbrall vor na Kevin und seiner Oldn miteran Gnaller olla zwa Ärbäggs aufganga sänn! Dessmoll woas neemlich am Schdraßn-rand ka beweechlicher Blasdiggbfosdn wie gesdern, sondern a ganz normoler aus massivn Beddong – und weecher na Kevin seiner hinderlisdichn Idee iss der Urlaub in Bad Füssing fei deier worrn… gerch