Der Luis lebbd mit seiner Fraa und drei Kinnern ineran Reihahaus am Schdadtrand – und der absoluda Liebling von derra fimfkebfinga Familie iss der Daggl „Lumpi“. Der Noma iss fir den glan Hund ka Zufall, wall‘er genauso so iss, wie er haaßd: schlau, mit alln Wassern gwaschn – und dank seiner gigandischn Schnüfflnosn immer genau do, wo’s aweng woss zern Fressn gibd. Der „Lumpi“ iss hold a Gribberla! Sogor wenn’er aus lauder Langwaal widder moll na Luis seina neia Schlabbn in 100 Fetzn zerleechd hot und bei der Gardina-Breedichd mit der Ausweisung ins Dierheim bedrohd werrd, wass‘er genau, wie’er aus derra Nummer rauskimmd: Er schaud dess Herrla mit san Dagglbligg o, waggld min Schwänzla – und olles iss widder guud.
