Der Hermann iss drotz seina 78 Johr gsundheidlich nuch gud aufm Damm. Seitdem sei Fraa gschdorm iss, lebbd’er zwoa ganz allaans in seiner glan Wohnung in Neihof, obber er driffd sich reglmeeßich mit seina oldn Kumbl afera Bier und hot ka Langwaal. Ollerdings hot’er seid drei Wochn aweng a Broblem mit san Moong. Erschd hot’er gedachd, dess liechd an der Schlachdschissl, die woss’er kerzlich ban Schdammdisch neigewerchd hot, obber wall dann a ganza Badderie von Verdaungs-Schnäbbsla ka Besserung gebrachd hot, iss der Hermann zern Doggder ganga – und der hot’na geecher die Moongverschdimmung zwelf Zäbfla verschriem. „Die werden rektal verwendet – nehmen Sie bitte jeden Morgen eins“, hot der Weißkiddl gsochd.
