Dess verhexda Erinnerungs-Foddo

Der Leo, der woss am Schdammdisch weecher san schdechendn Darschd „Japanischer Wunderschwamm“ haaßd, hot kerzlich a Wochn Urlaub am Ballermann in Mallorca gmachd. Vor na Riggfluuch nooch Nermberch woa der Leo nooch ana langa Bier-Nachd in oller Herrgoddsfrieh ziemlich zerzausd, keesweiß im Gsichd und mit ana leichdn Fahna zwischn die Urlaubermassn im Flughafn Palma gschdandn – do kimmd a elegannder Herr auf ihn zu und driggd na sei moderna Digital-Kamera in die Händ. „Guter Mann“, hot’er ganz freindlich zern Leo gsochd, „würden Sie bitte von mir und meiner Frau ein Erinnerungsfoto an unseren wunderbaren Mallorca-Urlaub machen?“ Der Leo hot aweng bleed aus seina glosinga Aang geglotzd, dessweecher hot der fremma Mo vorsichdsholber gleich an wichdinga Hinweis geem: „Sie müssen nur da oben rechts auf den Knopf drücken“.

Dann hot’er sei braungebrennda Fraa in Arm genumma – und olla zwa hamm na Leo ogschdrohld wie in der Blendax-Werbung. Also hot der Leo die Kamera vors Aach k’holdn und min Zeichefinger aufn Gnobf rechds oom nauf gedriggd, obber es hot net „gligg“ gmachd. Der Leo hot’s nuch a boormoll browierd, obber es woa wie verhexd – die Kamera hot ums Verreggn net fungzionierd. „Jetzt drücken Sie doch endlich ab“, hot der fremma Mo ungeduldich gforderd. Der Leo hot widder gedriggd und gedriggd – nix iss bassierd. Dessweecher hot der Mo sei Kamera gleich selber inschbizierd und hot dann zern Leo gsochd: „Sie haben meinen Fotoapparat kaputt gemacht. Den Schaden müssen Sie mir ersetzen – Sie haben hoffentlich eine Haftpflicht-Versicherung“.

Der Leo iss drotz seiner algoholischn Hirnschwächn hellwach worrn. „Bassn’Sa bloß auf“, hot’er den Kamera-Bsitzer gedrohd, „sinsd grieng’sa von mir a Schelln, dass’sa nuch drei Wochn lang an Bfeifdoon im Ohr drinna hamm“. Dann hot‘er des Bäärla vor sich schdeh gelossn, iss abgedrehd – und hot sich bei san aweng schwankendn Abgang in Gedankn gschworn, dass’er nie mehr in san Leem fir fremma Leit a Erinnerungs-Foddo machn werrd…