Erschd hot dess Corona-Virus unner Leem lahmgeleechd – und kaum hammer uns von derra elendn Bandemie aweng erhoold, grieng’mer weecher der Ukraine scho widder schwer woss aufn Deggl! Aa am Schdammdisch „Immer heiter“ werrd bloß nuch gejammerd, wall dess Benzin, dess Eel, der Schdrom, die Cörry-Warschd und dess Globabbier dermoßn deier worrn sänn, dass ann dess Lachn vergedd. Sogor der Leo, a Werrdshaus-Filosof mit Feddleber, der woss weecher san immer vorhandna schdechendn Darschd na Schbitznoma „japanischer Wunderschwamm“ hot, iss auf die Brems gschdieng – er hot san Konsum an Kristallwaazn radikol auf achd Seidla pro Schdammdisch-Amd zerrigg- gfohrn! Und der Vorschdand vom Schdammdisch, der old Adolf, will min Geld-Schboorn nuch an Schridd weider geh. „Ich wolld heier im Winnder mit meiner Oldn in die Karibigg flieng und auf der Dom-Rep zwa Wochn Urlaub machen“, hot’er seina Kumbl mit glanzlosa Aang informierd, „obber dess kenna’ma uns abschminkn. Mir werrd doch etzerd scho schwindlich, wenn ich an die Noochzohlunga fir Schdrom und Gas am End vom Johr denk!“