„Rote Liste“ ohne Schnabbswachdl

Hof - Jeder Dierfreind kennd die beriehmda „Rote Liste“, wo olla Viecher draaf schdänga, die wossn vom Ausschderm bedohd sänn – wassd scho: Guggugg und Hamsder, Greiz-odder, Eidechsn, Freschla und 14 000 annera Lebewesn, wo mer ofd na Noma nuch nie gelesn hot. Die „Rote Liste“ iss werglich lang, sogoa die Rebhiehner sänn inzwischn in grußer Gfohr, wall’sa ban Flieng bloß nuch seldn auf die Wiesn und Feller landn, sondern in der Broodbfanna.

Fir die Veegl gibd’s inzwischn sowieso nuch a exdra roda Lissdn, die woss obber nix mit ner Naduurschutz zer do hot. Do iss zern Beischbill die Schnabbswachdl oder ihr enga Verwandta, die Schnabbsdrossl. Olla zwa Veecherla sänn ziemlich schei und meidn am Dooch dess hella Lichd, dessweecher iss ihr Leemsraum erra aweng a Werrdshaus oder a schummricha Bor. Do lossn sich sedda Veegl am libbsdn an der Deekn nieder und zwidschern auseran glan Gleesla, a sogenannds Schdamberla, verschiedna Flissichkeidn in sich nei, die wossn aus Korn, Zwedschgn oder Bern, aus Ebfl, Marilln oder sogoa ols gemischda Obsdler gebrennd werrn. Wenn’sa dann mit ihrn feierrodn Schnobl genuuch gedrunkn hamm und ringsrum a boor Mannsbilder endeggn, leeng’sa ihr Zerrigghaldung ab und fanga mit schwera Zunga zern Balzn o. Ofd verwandld sich ihr Balzn ollerdings inera ziemlich lauds Gezeeder, und die Schnabbswachdln und Schnabbsdrossln schreia dess frecha Männla o: „Hau ab, du Dreggfink!“ – so werrd a genedischa Vermischung miteran fremma Vogl scho im Keim derschdiggd.

Im Geengsatz zu Schnabbswachdln und Schnabbsdrossln hamm mancha männlichn Viecher ka Schangsn, dass’sa zum Schutz auf die roda Lissdn naufkumma, wall’sa sich sowieso dauernd im „Rotlicht-Milieu“ aufhaldn – neemlich der gemeine Nachdschwärmer, der Huurnbogg und der Salonlöwe. Die sänn ollerdings darch die Bollizei bedrohd, sodass’sa immerzu ihr Revier wechsln missn. In Hof hot’mer‘sa frieher massdns im Bohnhofsverrdl endeggd, obber weecher der dauerndn Verfolchung darch die Bollizisdn woan‘sa immer merra vom Ausschderm bedrohd. Dessweecher sänn‘sa ab 1990 iber die offna Grenzn in die Tschechei ausgewanderd und hamm im Raum Eger a neia Haamed mit subber Leemsverhäldnissn gfunna … Gerch